ABŞ dövlət katibi: Sülh planı hər gün dəyişən ‘canlı sənəd’dir…
Poliqon xəbər verir ki, ABŞ dövlət katibi Marko Rubio Ukrayna münaqişəsinin həlli istiqamətində hazırlanmış sənədin hələ yekunlaşmadığını və Avropa İttifaqı ilə NATO-nun rolunun danışıqların növbəti mərhələsində müəyyənləşdiriləcəyini bildirib. Onun sözlərinə görə, Vaşinqton bu məsələləri Aİ üzv ölkələrinin təhlükəsizlik müşavirləri ilə artıq ilkin şəkildə müzakirə etməyə başlayıb.
Rubio vurğulayıb ki, üzərində işlənilən sülh planı sabit deyil və proses irəlilədikcə dəyişikliklər qaçılmaz olur.
“Bu, ‘canlı’ sənəddir, hər gün dəyişir. Burada aktivlərə dair məsələlər və ya Aİ ilə NATO-nun prosesdəki mümkün rolu kimi məqamlar var. Bu məsələlər onların maraqlarına toxunduğu üçün biz bunları avropalı tərəfdaşlarımızla mütləq müzakirə etməliyik”, deyə Rubio vurğulayıb.
ABŞ dövlət katibi qeyd edib ki, Avropa ölkələrinin mövqeyi planın uğurlu şəkildə formalaşdırılması üçün həlledici amillərdən biridir. Vaşinqton hazırda həm qitənin təhlükəsizlik arxitekturasını, həm də Ukraynanın gələcək müdafiə imkanlarını nəzərə alan geniş formatlı sənəd üzərində çalışır.
Rubionun açıqlaması Aİ və NATO-nun danışıqlarda oynayacağı rolun yaxın günlərdə aparılacaq intensiv diplomatik məsləhətləşmələrdə dəqiqləşdiriləcəyinə işarə edir. ABŞ diplomatlarının sözlərinə görə, qarşıdakı görüşlər sənədin son konturlarının müəyyənləşməsində xüsusi əhəmiyyət daşıyacaq.
Poliqon.info
