Bu gün UEFA Konfrans Liqasında 2-ci təsnifat mərhələsinin cavab oyunları keçirilib. SİA xəbər verir ki, Azərbaycan təmsilçilərindən “Araz-Naxçıvan” Yunanıstanda “Aris”in qonağı olub. Oyun 2:2 hesabı ilə yekunlaşıb.
Tərəflər arasında Bakıda oynanılan ilk matçda "Araz-Naxçıvan" 2:1 hesablı qələbə qazanıb ki, bu da Elmar Baxşıyevin komandasını növbəti mərhələyə aparıb.
Təmsilçimizin 3-cü təsnifat mərhələsindəki rəqibi Kipr "Omoniya"sı olacaq. “Araz Naxçıvan”la “Omoniya” arasında ilk oyun avqustun 7-də Bakıda, cavab oyunu avqustun 14-ü Kiprdə keçiriləcək.
Qeyd edək ki, bu gün "Sabah" da Konfrans Liqasında mərhələ adlayıb.
31 iyul
UEFA Konfrans Liqası, 2-ci mərhələnin cavab oyunu
22:15. “Aris” (Yunanıstan) - “Araz Naxçıvan” (Azərbaycan) - 2:2
Qollar: Çarls Boli, 11 (0:1), Felipe Santos, 37 (0:2), Fabiano Laysmann, 62 (1:2), Monçu, 90 (2:2)
Qırmızı vərəqə: İqor Ribeyro, 52 ("Araz-Naxçıvan")
Baş hakim: David Dikinson (Şotlandiya)
İlk oyun – 1:2
Saloniki. "Kleantis Vikelidis" stadionu
