Filippin Senatında K–12 dövlət məktəblərində təhsil alan bütün şagirdlər üçün pulsuz səhər yeməyi proqramının qanuniləşdirilməsi təklif edilib. Layihə senator Francis “Kiko” Pangilinan tərəfindən təqdim olunub və məqsəd uşaqların sağlamlığına, dərsdə iştirak səviyyəsinə və ümumi akademik nəticələrə dəstək verməkdir.
AzEdu.az xarici mənbədən aldığı məlumata əsasən xəbər verir ki, qanun layihəsinə əsasən:
- İbtidai və orta məktəblərdə (K–12 sistemi üzrə) təhsil alan bütün şagirdlər məktəbə başlamazdan əvvəl qida dəyəri yüksək səhər yeməyi ilə təmin olunacaq;
- Menyular rasion balansına uyğun olaraq minimum 300 kalori və əsas qida maddələri ilə tərtib ediləcək;
- Tədarük olunan məhsulların ən azı 50%-i yerli fermer və balıqçılardan alınacaq ki, bu da kənd təsərrüfatı sektorunu dəstəkləyəcək;
- Proqram “Uşaq Aclığına Son” təşəbbüsü çərçivəsində təhsildə sosial bərabərliyi artırmaq məqsədi daşıyır.
Senator Pangilinan bildirib ki, heç bir uşaq ac məktəbə getməməlidir və bu proqram gələcək nəslin uğuru üçün vacib addımdır. O əlavə edib ki, səhər yeməyi qidalanma ilə yanaşı, dərs zamanı diqqət, yaddaş və öyrənmə bacarığını da artırır.
Hazırda layihə Senatın təhsil və ictimai rifah komitələrində müzakirə mərhələsindədir. Əgər qəbul olunarsa, proqram ölkənin bütün dövlət məktəblərində mərhələli şəkildə tətbiq ediləcək.
