Böyük Britaniyada tələbə vizaları ilə bağlı miqrasiya sisteminə dair yeni narahatlıqlar gündəmə gəlib. Mühafizəkar yönümlü "Policy Exchange" düşüncə mərkəzinin hazırladığı hesabatda bildirilir ki, bəzi xarici tələbələr ölkəyə daxil olmaq üçün təhsil vizasından sui-istifadə edir və bu viza sistemini "miqrasiya üçün arxa qapı" kimi görürlər.
AzEdu.az xarici mənbədən aldığı məlumata əsasən xəbər verir ki, 2019-cu ildə Britaniyada tələbə vizası ilə gələnlərin yalnız 3 faizi sonradan başqa viza növünə keçmişdi. Amma 2023-cü ilə gəldikdə bu rəqəm 40 faiz-ə çatıb. Bu keçidlərin çoxu "Graduate Route" adlanan və məzunlara ölkədə iki il yaşayıb işləməyə imkan verən viza növü vasitəsilə həyata keçirilir.
Təklif edilən yeni yanaşmalardan biri yalnız doktorantura və yüksək akademik səviyyədə təhsil alanlara bu hüququ tanımaqdır. Bundan başqa, düşüncə mərkəzi beynəlxalq tələbələrdən illik 1 000 funt sterlinq əlavə vergi alınmasını da təklif edir.
Ekspertlər isə bildirirlər ki, bu yanaşma həm universitetlərin maliyyə dayanıqlığına, həm də Britaniyanın beynəlxalq təhsil brendinə zərər vura bilər.
