Malidə üsyançılar ölkənin müdafiə naziri Sadio Kamaranı öldürüblər. Hadisə baş verən vaxt o, özünün möhkəmləndirilmiş iqamətgahında olub. Kamara Rusiyanın əsas müttəfiqi adlandırılırdı. Reuters və Əl-Cəzirəyə görə, ölkənin bir neçə bölgəsində eyni vaxtda digər hücumlar baş verib. Sadio Kamara xunta rejiminin əsas fiquru və Mali ilə Rusiya arasındakı yaxınlaşmanın əsas memarı idi.
General Kamaranın paytaxt Bamakodan 15 kilometr aralıda yerləşən Kati qarnizon şəhərindəki iqamətgahı avtomobil bombası ilə hədəfə alınıb. General Əl-Qaidə ilə əlaqəli Camaat Nusrat əl-İslam vəl-Müslimin (JNIM) və Tuareq üsyançıları tərəfindən ölkə daxilində hərbi obyektlərə koordinasiyalı hücumlar zamanı öldürülüb. Əl-Cəzirəyə görə, hücumlar eyni vaxtda bir neçə bölgədə - paytaxt Bamakoda, şimaldakı Gao və Kidal şəhərlərində və ölkənin mərkəzindəki Sevaredə baş verib.
Bazar günü etibarilə Kidalda silah səsləri və partlayışlar hələ də davam edir. Ölkənin müvəqqəti prezidenti Assimi Qoyta zərər görməyib və təhlükəsiz yerə köçürülüb. Əvvəllər bir-biri ilə müharibə aparan Malidəki silahlı qruplar indi ortaq düşmənləri olan hökumət qüvvələrinə hücum etmək üçün birləşiblər. Assimi Qoytanın rəhbərlik etdiyi hazırkı hökumət 2020 və 2021-ci illərdə baş verən çevrilişlərdən sonra hakimiyyətə gəlib və Qərblə hərbi əməkdaşlığı rədd edərək Rusiya ilə daha sıx əlaqələr qurmağa çalışır. Kamara hakim hərbi rəhbərliyin ən nüfuzlu şəxslərindən biri idi və Malinin gələcək lideri kimi qəbul edilirdi.
"Əgər bu məlumat təsdiqlənərsə, Kamaranın ölümü Malinin hərbi rəhbərliyinə ciddi zərbə olar. Xuntanın əsas fiquru və Malinin Rusiya ilə yaxınlaşmasının əsas memarı kimi onun aradan götürülməsi JNIM-in dövlət hakimiyyətinin mərkəzinə zərbə vurmaq qabiliyyətini vurğulayacaq", - Qərbi Afrikada təhlükəsizlik məsələləri üzrə ixtisaslaşmış Strateji Araşdırmalar Fondunun (FRS) tədqiqatçısı Djenabou Sisse qeyd edib.
Birləşmiş Millətlər Təşkilatı, Afrika Birliyi və ABŞ rəsmiləri artıq bu hücumları rəsmi olaraq pisləyiblər.
Məlum olduğu kimi, Rusiya Müdafiə Nazirliyinin Afrika Korpusunun qüvvələri Malidə şimalda (Azavad) Tuareq üsyançılarına və mərkəzi bölgələrdə islamçılara qarşı döyüş əməliyyatlarında iştirak edir. Ruslar Sevare, Gao və Kidaldakı əsas hərbi bazalara nəzarət edir, həmçinin qızıl mədənlərini və digər mineral yataqlarını qoruyurlar.
Həmçinin bazar günü Malinin Gao şəhəri yaxınlığında Rusiya helikopterinin vurulduğu barədə xəbər yayılıb. Helikopterdə olan heyət və mobil yanğınsöndürmə qrupu həlak olub.
VƏLİ
