"Varşava Ukraynaya müdaxilə zamanı rus qoşunlarının hərəkətinin görüntülərini təqdim etməklə məşhurlaşan aparıcı peyk şirkəti “Iceye”nin payını almağa hazırlaşır".
HİT.az xəbər verir ki, bunu "Financial Times" yazıb.
Şirkətin baş direktoru Rafal Modzevski investisiyaların dəqiq məbləği açıqlanmasa da, danışıqların son mərhələdə olduğunu təsdiqləyib. Artıq toplanmış 550 milyon dollara əlavə olaraq Polşanın töhfəsinin olacağı gözlənilir.
2014-cü ildə Modzevski və həmkarı Finn Pekka Laurila tərəfindən qurulan "Iceye" əvvəlcə Arktika gəmiləri üçün radar görüntüləri hazırlaıb. Bununla belə, Ukraynada genişmiqyaslı müharibənin başlaması ilə şirkət Rusiya qoşunlarının hərəkəti haqqında məlumat verərək, müdafiə sektoruna yenidən diqqət yetirdi. Hazırda onun dəyəri 1 milyard dollardan çoxdur.
"Iceye" peykləri hava şəraitindən və günün vaxtından asılı olmayaraq şəkil çəkməyə imkan verən SAR (sintetik diafragma radarı) texnologiyasından istifadə edir. May ayında Polşa 230 milyon dollara altı belə peyk sifariş edib.
Polşa sərmayəsi milli inkişaf bankı vasitəsilə həyata keçiriləcək. Modzevskinin sözlərinə görə, şirkət peyk istehsalını 4-6 dəfə - ildə indiki 25-dən 100-150 ədədə qədər artırmağı planlaşdırır, bunun üçün əlavə kapital tələb olunacaq.
"Iceye" artıq 54 peyk buraxıb ki, onların da təxminən yarısı Niderland, Finlandiya, Braziliya və Portuqaliya kimi ölkələrin milli müdafiə qüvvələrinə xidmət edir. Şirkətin "BAE Systems" və BƏƏ ilə də tərəfdaşlığı var.
Geosiyasi qeyri-sabitlik, öz müdafiəsini gücləndirmək üçün ABŞ-ın Avropaya təzyiqi və Rusiyaya qarşı sanksiyalara görə Arktika bazarının azalması – bütün bunlar hərbi peyk çəkilişlərinə tələbatın artmasına səbəb olur.
"Ukraynada müharibə bitsə belə, müdafiə texnologiyalarına ehtiyac aradan qalxmayacaq", deyə Modzevski qeyd edib.
Samir
