1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
ABŞ Prezidenti Donald Tramp Rusiyaya qarşı sanksiyaları gücləndirmək üçün Avropa İttifaqı (Aİ) qarşısında çox çətin şərtlər qoyub.
Oxu.Az bu barədə "The New York Times" qəzetinə istinadla xəbər verir.
Dünən Tramp "Truth Sosial" platformasında yazmışdı ki, əgər bütün NATO ölkələri Rusiya neftini almağı dayandırarsa, Rusiyaya qarşı ciddi sanksiyalar tətbiq etməyə hazırdır. Bundan əlavə, o, Aİ-ni Çin mallarına kollektiv şəkildə 50-100% rüsum tətbiq etməyə çağırıb.
"Tramp və onun müşavirlərinə məlumdur ki, bu şərt demək olar ki, yerinə yetirilməyəcək", - deyə qəzetin materialında bildirilir.
Nəşrin müəllifi xatırladır ki, Rusiyadan neftin iki ən böyük alıcısı ABŞ prezidentinin "heyran qaldığı" Macarıstan və Türkiyədir:
"Əksər digər Avropa ölkələri Rusiya yanacağının idxalını əhəmiyyətli dərəcədə azaldıblar. Lakin onların bəziləri Rusiyadan tədarük edilən qazdan asılıdırlar".
