ABŞ-ın Dövlət katibi Marko Rubio və Dövlət Departamenti Amerika hakimiyyətinin təhlükəli hesab etdiyi bəzi qanuni miqrantların vizalarını ləğv edib.
Hafta.az xəbər verir ki, bu barədə Ağ Evin mətbuat katibi Karolin Levitt məlumat verib.
Levitt bildirib ki, Rubio öz səlahiyyətindən istifadə edərək ölkəyə qanuni şəkildə daxil olan, lakin ABŞ üçün təhlükə yaradan və əslində heç vaxt qəbul edilməməli olan çoxsaylı şəxslərin vizalarını ləğv edib. Onun sözlərinə görə, Dövlət Departamenti ABŞ vizası üçün müraciət edənlərlə bağlı tələbləri və yoxlama prosedurlarını xeyli sərtləşdirib.
Bundan əvvəl ABŞ Vətəndaşlıq və İmmiqrasiya Xidməti xarici vətəndaşların sığınacaq müraciətlərinə baxılmasını müvəqqəti olaraq dayandırmışdı. Prezident Donald Tramp administrasiyanın ölkəyə daxil olan sığınacaq axtaran şəxslərin deportasiyasını planlaşdırdığını, həmçinin üçüncü dünya ölkələrindən insanların qəbulunun və köçürülməsinin müddətsiz olaraq dayandırılacağını bəyan etmişdi.
Rubio isə ABŞ hakimiyyətinin Əfqanıstan vətəndaşları üçün vizaların verilməsini dayandırdığını açıqlayıb. Bu addım ötən həftə Ağ Ev yaxınlığında baş verən və şübhəlinin Əfqanıstan vətəndaşı olduğu bildirilən atışma ilə əlaqədar atılıb.
