AZ
Mövzular
Siyasət
30.06.2025 ◦ 16:16

Rusiya Azərbaycanı yenidən öz təsir dairəsinə salmağa çalışır — Politoloq

“Yekaterinburqda və Rusiyanın digər bölgələrində azərbaycanlılara qarşı baş verən zorakılıq hallarını qəti şəkildə qəbuledilməz hesab edirik. Bu hadisələr ilk növbədə insan hüquqlarının pozulması, banditlik və qeyri-rus millətlərinə qarşı terror ab-havasının, islamofobiyanın, eləcə də etnik ayrı-seçkiliyə əsaslanan aşağılayıcı yanaşmanın təzahürü kimi qiymətləndirilməlidir”.

Bu sözləri Demokrat.az-a açıqlamasında politoloq Oqtay Qasımov deyib.

O əlavə edib ki, bu, Rusiya cəmiyyətinə və dövlət siyasətinə xas olan bir ənənədir və yeni hal deyil:

“Son əsr yarımda Rusiya İmperiyası dövründən bu yana ifrat millətçilik və digər xalqlara qarşı nifrəti körükləyən siyasətin şahidi olmuşuq. Tarix bunu dəfələrlə sübut edib. Yekaterinburqda baş verən hadisələr hər hansı kriminal məsələ ilə izah oluna bilməz. Bu, sırf milli ayrı-seçkilikdir və Rusiya dövlət siyasətinin tərkib hissəsi kimi dəyərləndirilməlidir. Azərbaycanlılara qarşı aparılan bu genişmiqyaslı təzyiq kampaniyası, əslində, Azərbaycan dövlətinə qarşı yönəlmiş təzyiqin bir formasıdır. Rusiya Azərbaycanı yenidən öz təsir dairəsinə salmağa, onun vasitəsilə regional maraqlarına nail olmağa çalışır. Rusiya, Azərbaycanın öz ərazi bütövlüyünü və suverenliyini təmin etməsindən narazıdır. O, bölgədə əsas söz sahibi kimi Azərbaycanın güclənməsini istəmir. Xüsusilə də Azərbaycan və Ermənistan arasında normallaşma prosesinin məhz Azərbaycanın təşəbbüsü ilə Rusiyasız davam etməsi Kreml üçün ciddi narahatlıq doğurur. Rusiya Azərbaycanın Zəngəzur dəhlizini hərbi güclə açmaqdan imtina etməsini və bu məsələni sülh gündəliyindən ayıraraq ayrıca müzakirə predmeti kimi təqdim etməsini də qəbul edə bilmir”.

Politoloq qeyd edib ki,  Azərbaycanın təhlükəsizlik və müdafiə sistemini müasir tələblər əsasında qurması da Rusiyada qıcıq doğurur:

“Bu səbəbdən Rusiya Azərbaycana təzyiq göstərməyə çalışır. Biz artıq Ukrayna müharibəsi başlayanda xəbərdarlıq etmişdik ki, Rusiya bu münaqişədə müəyyən uğur qazansa, növbəti hədəflərindən biri də Azərbaycan olacaq. Çünki Azərbaycan Cənubi Qafqazda yeni reallıq yaradan və regional güc mərkəzinə çevrilmiş dövlətdir və Rusiya bunu qəbul etmək istəmir. Hazırda Rusiyanın Azərbaycana təzyiq göstərmək üçün ciddi mexanizmləri qalmayıb. Son vasitəsi Rusiyada yaşayan milyonlarla azərbaycanlı miqranta qarşı təzyiqlərdir. Bu yolla Rusiya ölkəmizdə sosial-iqtisadi gərginlik yaratmağa və ictimai narazılıq doğurmağa çalışır. Lakin hesab edirəm ki, Azərbaycan cəmiyyəti bu proseslərin mənasını və arxasında duran məqsədləri yaxşı anlayır. Dövlət və xalq olaraq bu təzyiqlərə qarşı durmaq və Azərbaycanın müstəqil siyasətini davam etdirmək üçün həm siyasi, həm də ictimai iradə mövcuddur”.

Leyla Turan
Demokrat.az
Seçilən
89
50
demokrat.az

10Mənbələr