Rusiya Ukraynaya qarşı müharibədə iştirak üçün xarici vətəndaşların cəlb olunmasını artırır. Kreml iş təklifləri görüntüsü altında Afrika ölkələrinin vətəndaşlarını daha fəal şəkildə bu prosesə cəlb edir...
Poliqon xəbər verir ki, bu barədə Foreign Policy nəşri yazır.
Keniyalı vətəndaş Klinton Mogesin hadisəsi problemin miqyasını göstərir. Qətərdəki işini başa vurduqdan sonra o, ailəsinə Rusiyada yeni iş tapdığını bildirib, lakin bir neçə gün sonra hərbi hazırlıq düşərgəsinə düşüb. Daha sonra Ukrayna kəşfiyyatı onun Ukraynanın işğal olunmuş ərazilərində həlak olduğunu təsdiqləyib. Ukrayna mənbələrinə görə, onun üzərində oxşar sxemlə cəlb olunduğu ehtimal edilən digər keniyalılara aid sənədlər də olub.
Tammiqyaslı müharibə başlayandan sonra Rusiya daha çox xarici vətəndaşları – Asiya, Yaxın Şərq, Afrika və Latın Amerikasından olan şəxsləri cəlb edir. Ukrayna kəşfiyyatının qiymətləndirməsinə əsasən, Moskva 2026-cı ildə ən azı 18 500 xarici döyüşçü cəlb etməyi planlaşdırır.
Xarici döyüşçülərin payı hələlik nisbətən az olsa da, böyük itkilər fonunda onların rolu artır. Strateji Araşdırmalar Mərkəzinin analitiklərinin hesablamalarına görə, Rusiya qüvvələrinin ümumi itkiləri təxminən 1,3 milyon nəfərə çata bilər.
Keniya hakimiyyətinin məlumatına görə, artıq 1000-dən çox ölkə vətəndaşı bu sistemə cəlb olunub. Onların onlarla nəfəri yaralanıb, bəziləri geri qayıdıb, bir qismi itkin düşmüş sayılır, həlak olanlar da var.
Məqalədə qeyd olunur ki, işə qəbul çox vaxt yerli agentliklər və vasitəçilər vasitəsilə həyata keçirilir. Onlar sürücü, aşpaz və ya xidmət personalı kimi işlər təklif edirlər.
"Afrika Səsi" hüquq müdafiə təşkilatının nümayəndəsi Fred Ociro bildirib: "Bunlar şüurlu şəkildə döyüşə gedən əsgərlər deyil. Bunlar adi işə getdiklərini düşünən gənclərdir".
Bununla yanaşı, bəzi şəxslər bu qərarı bilərəkdən qəbul edir. Beynəlxalq Böhran Qrupunun Afrika proqramı üzrə direktor müavini Polin Baks qeyd edir ki, yüksək işsizlik və Avropaya miqrasiya imkanlarının məhdudluğu insanları riskli addımlar atmağa vadar edir: "İnsanlar, xüsusilə Avropaya giriş qaydalarının sərtləşdiyi bir vaxtda, Rusiyaya viza əldə etmək fürsətindən istifadə edirlər".
Rusiya tərəfindən qurulan işə qəbul infrastrukturu sosial şəbəkələri və messencerləri (o cümlədən Telegram və VK), Afrikadakı kadr agentliklərini, Rusiyada və Yaxın Şərqdə fəaliyyət göstərən vasitəçiləri, eləcə də "Vaqner" qrupu və onun davamçıları ilə mümkün əlaqələri əhatə edir.
Keniyada aparılan araşdırmalar bəzi məmurların və hava limanı əməkdaşlarının rüşvət qarşılığında bu prosesə kömək etdiyini göstərir.
Rusiyanın Nayrobidəki səfirliyi qanunsuz işə qəbul iddialarını rədd edir və bildirir ki, xarici vətəndaşlar ölkədə qanuni əsaslarla olduqları halda könüllü şəkildə orduya qoşula bilərlər.
Ukraynalı diplomatların məlumatına görə, ən azı 36 Afrika ölkəsinin vətəndaşları Rusiya tərəfində döyüşənlər arasında müşahidə olunub.
Poliqon.info
