Yaxın Şərqdə ABŞ və İran arasında gərginlik yenidən beynəlxalq gündəmin əsas mövzularından birinə çevrilib. Xüsusilə hərbi eskalasiya ehtimalları, iqtisadi təzyiqlər və strateji dəniz yolları üzərində nəzarət məsələləri regionda vəziyyətin həssaslığını daha da artırır. Bu fonda tərəflərin növbəti addımları və mümkün qarşıdurma ssenariləri dünya ictimaiyyəti tərəfindən diqqətlə izlənilir.
ABŞ və İsrailin İrana qarşı mümkün yeni hərbi addımları beynəlxalq gündəmin əsas müzakirə mövzularından biri olaraq qalır.
Bunu politoloq Əlimusa İbrahimov News365.az-a açıqlamasında bildirib.
O qeyd edib ki, hazırkı mərhələdə ABŞ prezidenti Donald Tramp tərəfindən İrana qarşı yeni hücumla bağlı açıq siqnallar verilmir, lakin iqtisadi təzyiqlər davam edir.
Politoloqun sözlərinə görə, Vaşinqtonun əsas strategiyası İranın iqtisadi imkanlarını məhdudlaşdırmaqdır:
“ABŞ İranı iqtisadi məngənədə sıxmaq, dəniz ticarət yollarını və xüsusilə Hörmüz boğazı üzərindən keçən nəqliyyatı nəzarət altına almaqla təzyiq göstərməyə çalışır”.
O bildirib ki, Hörmüz boğazı İran üçün mühüm strateji əhəmiyyət daşıyır və bu bölgədə yaranan məhdudiyyətlər ölkənin iqtisadi vəziyyətinə ciddi təsir göstərir.
Əlimusa İbrahimov əlavə edib ki, ABŞ-ın məqsədi hərbi eskalasiyadan daha çox danışıqlar masasına təzyiq yaratmaqdır:
“İranın iqtisadi çətinliklər fonunda danışıqlara məcbur qalacağı ehtimalı nəzərdən keçirilir”.
Onun sözlərinə görə, regiona hərbi qüvvələrin cəlb olunması davam etsə də, hazırda yaxın zamanda yeni hücumla bağlı ciddi siqnallar müşahidə olunmur.
Politoloq qeyd edib ki, eyni zamanda dəniz yollarında gərginlik və gəmilərin hərəkəti ilə bağlı məhdudiyyətlər də vəziyyəti daha da mürəkkəbləşdirir.
O vurğulayıb ki, hazırkı proseslər əsasən siyasi və iqtisadi təzyiq vasitələri üzərindən idarə olunur və tərəflər arasında gərginlik hələ də yüksək olaraq qalır.
