Universitetlərə qəbul qaydaları ölkədən ölkəyə dəyişir. Bəzi ölkələrdə ali təhsil müəssisələrinə qəbul olmaq nisbətən asan görünsə də, dünyanın bir sıra ölkələrində bu proses ciddi seçim mərhələləri və yüksək rəqabət tələb edir.
AzEdu.az mövzu ilə bağlı araşdırma təqdim edir.
ABŞ - Dünyanın ən nüfuzlu universitetləri – Harvard, MIT, Stanford və digərləri – qəbul zamanı çox ciddi meyarlara əsaslanır. Abituriyentlərdən yalnız yüksək akademik nəticələr deyil, həm də sosial fəaliyyətlər, tövsiyə məktubları və esse yazıları tələb olunur.
Böyük Britaniya - Oksford və Kembric kimi universitetlərdə qəbul çox çətindir. Namizədlər yalnız yüksək qiymətlər toplamaqla kifayətlənmir, həm də əlavə müsahibələr və xüsusi imtahanlardan keçməli olurlar.
Almaniya və Fransa - Avropanın bu ölkələrində təhsil pulsuz və ya çox aşağı ödənişlidir. Buna görə də tələbə axını çoxdur və qəbul prosesi kifayət qədər seçici aparılır. Xüsusən də tibb və mühəndislik ixtisaslarına qəbul olduqca çətindir.
Yaponiya və Cənubi Koreya - Asiyada təhsil üzrə aparıcı ölkələrdə universitetə qəbul milli səviyyəli imtahanlarla müəyyən edilir. Burada rəqabət son dərəcədə yüksəkdir və çox vaxt yalnız ən yaxşı nəticə göstərənlər tələbə adını qazana bilir.
Çin - Bu ölkədə “Gaokao” adlanan milli qəbul imtahanı dünyanın ən çətin testlərindən hesab olunur. Hər il milyonlarla şagird bu imtahanda iştirak edir və yalnız ən yüksək nəticə göstərənlər aparıcı universitetlərə qəbul oluna bilir.
