Çinli tədqiqatçılar süni intellekt sahəsində mühüm yeniliyə imza atıblar.
Valyuta.az xəbər verir ki, Şanxay Jiao Ton Universiteti və Zhejiang Universitetinin alimləri tərəfindən hazırlanan və “MemOS” adlandırılan sistem dünyanın ilk süni intellekt yaddaş əməliyyat sistemi kimi təqdim olunub.
Bu texnologiya süni intellekt modellərinə insan beyninə bənzər yaddaş və məntiqi düşünmə bacarığı qazandırmağı hədəfləyir. Ənənəvi AI sistemlərinin əsas problemlərindən biri olan qısa müddətli yaddaş və informasiya itkisi “MemOS” ilə aradan qaldırılmağa çalışılır.
“MemOS” nə edir?
Yeni sistem yaddaşı emal prosessoru (CPU) və saxlama qurğuları ilə bərabər səviyyədə əsas hesablama resursu kimi dəyərləndirir. Bu da AI modellərinə öyrəndiklərini yadda saxlamaq, əlaqələndirmək və məntiqi çıxarışlar etmək imkanı verir.
“MemOS”in əsas komponentlərindən biri “MemCubes” adlı modulyar yaddaş bloklarıdır. Bu bloklar müxtəlif növ informasiyaları toplayır, zamanla daşına və inkişaf etdirilə bilir. Bu isə modellər arasında bağlamsal keçid və uzunmüddətli yaddaş imkanları yaradır.
“ChatGPT” ilə müqayisədə üstün nəticələr
Tədqiqatçılar nəticələrini arxiv elmi platformasında dərc ediblər. Sınaqlar zamanı “MemOS”un “OpenAI”ın “ChatGPT” modelindən məntiqi çıxarışda 159%, yaddaş performansında isə 38,98% daha üstün nəticələr göstərdiyi bildirilib.
Xüsusilə bir neçə dialoq arasında məlumatların əlaqələndirilməsi kimi mürəkkəb tapşırıqlarda MemOS daha effektiv işləyib. Bu baxımdan sistem, süni intellekt alətlərinə insanabənzər yaddaş funksiyası əlavə edir.
Açıq mənbəli gələcək
“MemOS” sistemi artıq GitHub üzərindən açıq mənbə kodlu layihə kimi paylaşılıb. Gələcəkdə müxtəlif süni intellekt modellərinə inteqrasiya ediləcəyi gözlənilir. Bu isə süni intellekt texnologiyalarında daha dərin yaddaş, kontekst anlayışı və insani təcrübəyə yaxınlaşma potensialı deməkdir.
Sərvanə Rəmixanova
