İqtisadiyyat Nazirliyi yanında Dövlət Vergi Xidmətinin (DVX) tələbələr üçün təşkil etdiyi sayca dördüncü “Yay Təcrübə Proqramı” çərçivəsində yay düşərgəsinin açılış mərasimi keçirilib.
DVX-nin Şamaxı rayonunda yerləşən Tədris Mərkəzində təşkil olunmuş tədbirdə “Yay Təcrübə Proqramı”nın mahiyyəti, tələbələrin inkişafına yönəlmiş fəaliyyətlər və asudə vaxtlarının səmərəli keçirilməsi istiqamətində tədbirlər barədə məlumat verilib. Açılış mərasimində düşərgənin tələbələrin həm müvafiq biliklər əldə etməsi, həm də şəbəkələşməsi üçün faydalı platforma olduğu vurğulanıb. Qeyd olunub ki, “Yay Təcrübə Proqramı”na maraq ildən-ilə artır və bu il 1000-ə yaxın namizəd layihəyə qoşulmaq üçün müraciət göndərib.
Bir həftə davam edəcək yay düşərgəsində müxtəlif universitetlərdən 60-dək tələbə iştirak edir. Həmin müddət ərzində iştirakçılara daxili və kənar təlimçilər tərəfindən vergi inzibatçılığı, vergi ödəyicilərinə göstərilən xidmətlər, fərdi səriştələrin inkişafı istiqamətində təlimlər, gənclərin asudə vaxtlarının səmərəli keçirilməsi məqsədilə interaktiv oyunlar və Şamaxının turizm məkanlarına səfərlər təşkil olunacaq.
Bu il “Yay Təcrübə Proqramı” sentyabr ayının 5-dək davam edəcək. Yay düşərgəsinin davamında iştirakçılar DVX-nin müxtəlif struktur bölmələrində 8 həftə müddətində təcrübə keçəcəklər.
