Hindistanın müdafiə sənayesində strateji muxtariyyət axtarışının ən simvolik layihələrindən olan “Kaveri” reaktiv mühərrikinin inkişafı proqramı təxminən 40 illik macəra və yüz milyonlarla dollar investisiyadan sonra rəsmən uğursuzluqla nəticələndi.
Hafta.az-ın yazdığına görə, Hindistanın Müdafiə Araşdırmaları və İnkişafı Təşkilatı (DRDO) tərəfindən həyata keçirilən layihə, ölkənin yerli vasitələrlə inkişaf etdirdiyi “Tejas” Yüngül Döyüş Təyyarəsini (LCA) gücləndirmək məqsədinə nail ola bilmədi. Bu isə Hindistanın kritik texnologiyadan xarici asılılığının davam edəcəyi deməkdir.
Təxminən 40 il əvvəl konseptuallaşdırılmış və 1989-cu ildə rəsmən təsdiqlənmiş “Kaveri” proqramı Hindistanın Qaz Turbinləri Tədqiqat Təşkilatı (GTRE) tərəfindən böyük ümidlərlə başlamışdı. Onilliklər ərzində aparılan inkişaf, sınaq və optimallaşdırma səylərinə baxmayaraq, GTX-35VS Kaveri adlanan mühərrik “Tejas” döyüş təyyarəsinin tələb etdiyi yüksək performans meyarlarına, xüsusilə də itələmə və etibarlılıq standartlarına cavab verə bilmədi.
Rəsmi rəqəmlərə görə, bu günədək layihəyə 400 milyon dollardan çox vəsait xərclənməsi də bu texnoloji uğursuzluğun maliyyə ölçüsünü ortaya qoyur.
