Böyük Britaniyanın ABŞ-dakı səfirinin müavini Ceyms Rosko qəfildən vəzifəsindən azad edilib.
Musavat.com "The Times" qəzetinə istinadən xəbər verir ki, Vaşinqtondakı ikinci böyük rütbəli Britaniya diplomatının işdən çıxarılması Milli Təhlükəsizlik Şurasının iclasında müzakirə edilən məxfi məlumatların sızması ilə bağlı araşdırma ilə əlaqədardır.
Məqalədə deyilir ki, bu sızma Britaniya nazirlərinin son həftələrdə İrana qarşı müharibə ilə bağlı açıqlamalarının mediaya çıxmasına səbəb olub.
"The Times" yazır ki, diplomatın vəzifədən alınması gözlənilməz olub və 19 mayda elektron poçtla bu barədə məlumatlandırılan səfirlik işçilərinə qərarın heç bir səbəbi bildirilməyib.
2025-ci ilin sentyabrında pedofiliyada ittiham olunan amerikalı maliyyəçi Ceffri Epşteynlə münasibətlərinə görə Britaniya səfiri Peter Mandelsonun işdən çıxarılmasından sonra Rosko beş ay diplomatik nümayəndəliyin rəhbəri vəzifəsini icra edib. O, ötən il ABŞ Prezidenti Donald Trampın Birləşmiş Krallığa dövlət səfərinin və 2026-cı ilin aprelində Kral III Çarlzın cavab dövlət səfərinin təşkilində fəal rol oynayıb. Rosko səfir vəzifəsinə namizəd göstərilsə də, bu vəzifə 2025-ci ilin dekabrında karyera diplomatı və Birləşmiş Krallığın BMT-dəki keçmiş daimi nümayəndəsi Kristian Ternerə verilib.
Musavat.com
