Prins Ovusu “Qəbələ” ilə yeni müqaviləyə imza atdı

Azərbaycan Premyer Liqasında mübarizə aparan “Qəbələ” futbolçusu Prins Ovusu ilə müqavilənin müddətini uzadıb.

Arena.az bu barədə əyalət təmsilçisinin rəsmi saytına istinadən xəbər verir.

Tərəflar arasında 2028-ci ilin iyununa qədər anlaşma imzalanıb.

Xatırladaq ki, Prins Ovusu “Qəbələ”nin əsas komandasına 2025-ci ilin yayında cəlb edilib. Maraqlıdır ki, klub həmin vaxt da onunla 3 illik müqavilə imzalandığını bəyan etmişdi.

20 yaşlı vinger “Qəbələ”nin əsas komandasının heyətində keçirdiyi 29 oyunda 7 qol vurub və 3 məhsuldar ötürmə verib.

“Qəbələ” Ovusunu Qananın Nayan Akademiyasından transfer edib. Futbolçu ötən mövsüm əyalət klubunun U-19 komandasında da çıxış edib. O, bu komanda ilə U-19 Liqasının gümüş mükafatçısı olub. Qanalı vinger keçirdiyi 14 oyunda 11 qol və 5 assistə imza atıb.