Fevralın 4-də Birləşmiş Ərəb Əmirliklərinin paytaxtı Əbu-Dabidə Rusiya-Ukrayna münaqişəsinin nizamlanması ilə bağlı növbəti danışıqlar keçiriləcək. Bu barədə "RİA Novosti" məlumat yayıb.
Hafta.az xəbər verir ki, agentliyin mənbəsi danışıqların qapalı rejimdə keçirildiyini, mətbuatın dəvət olunmadığını bildirib.
Qeyd edək ki, fevralın 4-ü və 5-də Əbu-Dabidə Ukraynada münaqişənin həlli ilə bağlı Rusiya, Ukrayna və ABŞ üçtərəfli danışıqlarının ikinci mərhələsi keçiriləcək. Bildirilir ki, Qərb bu görüşün "həqiqətən konstruktiv" və "ümidverici" olacağına ümid edir.
Xatırladaq ki, Ukrayna təmsilçiləri artıq Əbu-Dabidədirlər. Nümayəndə heyətinə Ukrayna Milli Təhlükəsizlik və Müdafiə Şurasının katibi Rustem Umerov rəhbərlik edir.
ABŞ tərəfini isə prezidentin xüsusi elçisi Stiv Uitkoff və Ağ Ev rəhbərinin kürəkəni, sahibkar Cared Kuşner təmsil edəcəklər.
Rusiya nümayəndə heyətinə Rusiya Silahlı Qüvvələri Baş Qərargahının Baş Kəşfiyyat İdarəsinin rəisi İqor Kostyukov rəhbərlik edir.
