İslam Respublikasının kəşfiyyat naziri İsmail Xətib bildirib ki, İran kəşfiyyatı İsrailin nüvə və hərbi obyektləri, o cümlədən işçiləri və alimləri haqqında çoxlu məxfi məlumat əldə edib.
Publika.az xəbər verir ki, Xətib bu barədə “Tasnim” xəbər agentliyinə müsahibəsində bildirib:
“Ölkəyə gətirilən materiallarda İsrailin hərbi və nüvə layihələri, onların modernləşdirilməsi, ABŞ və bir sıra Avropa ölkələri ilə birgə proqramları, habelə nüvə silahının hazırlanmasında iştirak edən komandanlıq strukturu və şəxslər haqqında dəyərli məlumatlar var”.
Xətibin sözlərinə görə, kəşfiyyat 189 israilli mütəxəssis haqqında tam məlumat, o cümlədən adlar, şəxsi məlumatlar və ünvanlar, həmçinin ikili istifadə üçün məxfi obyektlərin koordinatlarını əldə edib. Bu obyektlər sonradan iyun ayında İsraillə “12 günlük müharibə” adlanan zaman İran raketləri ilə məhv edilib.
Nazir qeyd edib ki, bir çox israilli ya maddi səbəblərə, ya da İsrailin baş naziri Benyamin Netanyahuya qarşı şəxsi ədavətinə görə könüllü olaraq Tehranla əməkdaşlıq edib.
