Yeni peyk görüntüləri Hind okeanındakı strateji ABŞ hərbi bazası olan Diego Qarsiyada Amerika Hərbi Hava Qüvvələrinə məxsus hərbi texnikanın toplanmağa başladığını üzə çıxarıb.
Bu inkişaf ABŞ və İsrailin İrana qarşı hücumlarından sonra Yaxın Şərq və Hind-Sakit okean regionunda gərginliyin artdığı bir vaxta təsadüf edir.
Diego Qarsiyanın əhəmiyyəti nədir?
NTV-nin məlumatına görə, Diego Qarsiya ABŞ-ın Yaxın Şərqdən Cənub-Şərqi Asiyaya qədər uzanan geniş ərazidə həyata keçirdiyi hərbi əməliyyatlar üçün həyati əhəmiyyət daşıyan bazalardan biridir. Bazanın ucqar yerləşməsi və geniş infrastruktur imkanları onu uzunmənzilli hava hücumları və sürətli müdaxilə missiyaları üçün ideal platformaya çevirir.
Hazırda müşahidə edilən hərbi yığınaq isə bölgədə mümkün yeni əməliyyatlara hazırlıq siqnalı kimi qiymətləndirilir.
Onlarla hərbi təyyarə bazaya yerləşdirilib
Peyk görüntülərinə əsasən, hazırda bazada 4 ədəd B-52 strateji bombardmançı təyyarəsi, 6 F-15 qırıcı və 6 KC-135 hava yanacaq doldurma təyyarəsi yerləşdirilib.
İranla təxminən 3 500 kilometr, Cənubi Çinlə isə 4 800 kilometr məsafədə yerləşən bu təcrid olunmuş ada, ABŞ-ın hava qüvvələri üçün təhlükəsiz və uzaqmənzilli əməliyyatlar baxımından əhəmiyyətli strateji başlanğıc nöqtəsi sayılır.
Mütəxəssislərə görə, mart ayından bəri bazaya İrana qarşı mümkün hücuma hazırlıq məqsədilə mühüm hərbi texnika və resurslar daşınıb.//publika.az
