ABŞ-ın rəhbərlik etdiyi Ukrayna sülh planında Kremlin adından danışıqlarda iştirak edən Harvard təhsilli rusiyalı iqtisadçı Kirill Dmitriyevin rolu beynəlxalq mətbuatda diqqətlə araşdırılıb.
Hafta.az-ın yazdığına görə, ABŞ prezidenti Donald Tramp administrasiyası tərəfindən hazırlanan 28 maddəlik sülh planı bu həftə Kiyevə təqdim edilib.
Trampın kürəkəni Cared Kuşner və prezidentin Yaxın Şərq üzrə xüsusi nümayəndəsi Stiv Vitkov ötən ay Mayamidə Rusiya Birbaşa İnvestisiya Fondunun (RDIF) sədri Kirill Dmitriyevlə planın təfərrüatlarını müzakirə etmək üçün görüşüblər.
Məlumat üçün bildirək ki, Vaşinqton 2022-ci ildə Ukrayna müharibəsinin başlamasından sonra RDIF-i sanksiya siyahısına daxil edib. Adının çəkilməsini istəməyən ABŞ rəsmisi bildirib ki, Rusiya prezidenti Vladimir Putinin beynəlxalq iqtisadi əməkdaşlıq üzrə xüsusi nümayəndəsi Dmitriyevə Ağ Ev tərəfindən ölkəyə daxil olmaq üçün xüsusi icazə verilib.
Mayamidəki görüşlərlə tanış olan iki rəsmi şəxs Ukrayna Milli Təhlükəsizlik və Müdafiə Şurasının katibi Rüstəm Umerovun da planı müzakirə etmək üçün şəhərə Vitkoffla səfər etdiyini bildirib.
Vitkoff bu səfər zamanı planı Umerova izah edib. Onlar həmçinin ABŞ-ın planı çərşənbə günü Türkiyə vasitəsilə Ukraynaya göndərdiyini deyirlər. Ağ Ev layihə mətnini cümə axşamı birbaşa Kiyevə təqdim edib.
Umerov prosesdə yalnız "texniki rol" oynadığını və planın təfərrüatlarını ABŞ rəsmiləri ilə müzakirə etmədiyini iddia edir.
ABŞ rəsmiləri həmçinin Tramp administrasiyasının Dmitriyevlə görüşünün "kəşfiyyat ictimaiyyəti daxilində narahatlıqlar yaratdığını" bildirirlər. Məlumata görə, Mərkəzi Kəşfiyyat İdarəsi şərh tələblərinə cavab verməyib.
Gənc yaşlarında Stanford və Harvard kimi nüfuzlu Amerika universitetlərində təhsil alan Dmitriyev, Rusiyanın 2016-cı il ABŞ prezident seçkilərinə müdaxiləsi iddiaları ilə bağlı istintaqa rəhbərlik edən keçmiş xüsusi müşavir Robert Müllerin hesabatında da qeyd olunub.
Dmitriyevin Trampın ilk səlahiyyət müddəti ərzində Vaşinqton-Moskva münasibətlərini bərpa etmək üçün əlaqələr qurduğu bildirilir. Bu dövrdə Dmitriyev xüsusilə Kuşnerlə təkbətək dialoq aparıb.
Hesabatda həmçinin qeyd olunur ki, Dmitriyev 2019-cu ildə İraq müharibəsində mülki şəxslərin öldürülməsindəki rolu ilə ön plana çıxan ABŞ özəl təhlükəsizlik şirkəti Blacwater-in baş direktoru Erik Prins ilə görüşüb. Həmçinin bildirilir ki, Trampın tərəfdarı olan Prins və rusiyalı iqtisadçı ABŞ-Rusiya münasibətlərini müzakirə ediblər.
Dmitriyev həmçinin Tramp administrasiyasının tənqidləri ilə üzləşib. İqtisadçı Trampın ötən ay Rusiya neft nəhənglərinə qarşı sanksiyalar tətbiq etmək qərarını tənqid edərək bunun qiymətləri artıracağını bildirib. ABŞ Maliyyə Naziri Skott Bessent Dmitriyevi sərt tənqid edərək onu "Rusiya təbliğatçısı" adlandırıb.
