İrəvanda son günlər ard-arda baş verən həbslər, xüsusilə “iş adamı” kimi təqdim edilən, əslində isə Rusiyanın Ermənistandakı təsir şəbəkəsində mühüm yer tutduğu iddia olunan milyarder Samvel Karapetyanın saxlanılması, ölkədə siyasi balansın dəyişdiyini açıq şəkildə göstərir.
Musavat.com xəbər verir ki, bu proses artıq təkcə hüquqi araşdırma yox, Paşinyan hökumətinin Kremlin təsirini sıradan çıxarmaq istiqamətində həyata keçirdiyi genişmiqyaslı siyasi əməliyyatın tərkib hissəsi sayılır.
Karapetyan kimdir və niyə “Moskvanın adamı” sayılır?
Erməni ictimaiyyətinə xeyriyyəçi və biznesmen kimi təqdim olunan Samvel Karapetyan illərdir Rusiya ilə sıx münasibətləri, Moskvanın iqtisadi–ideoloji dairələri ilə əlaqələri və kilsə daxilindəki Kreml yönlü qruplarla əlaqəsi ilə tanınır. O, uzun illər Rusiyanın biznes mühitində fəaliyyət göstərən erməni dairələri ilə işləyib. Moskvanın Ermənistandakı təsir kanallarında – xüsusən kilsə, oliqarx şəbəkələri və rusiyapərəst siyasi cərəyanlar içində mühüm fiqur kimi göstərilib; Rusiyanın dini strukturları və Moskva Patriarxiyası ilə əməkdaşlıqda adı hallanıb; Ermənistanı uzun illər Rusiyadan asılı saxlayan maliyyə-siyasi qruplaşmalarla əlaqəli simalardan biri kimi qiymətləndirilib.
Paşinyan hakimiyyəti Moskva təsirinin xırda halqalarını belə kəsmək yolunda hərəkət etdikcə, Karapetyanın həbsi çoxlarının gözündə Kremlin Ermənistandakı dayaqlarından birinin çökdürülməsi kimi qiymətləndirilir.
Paşinyan–Kreml qarşıdurması: “5-ci kolon”un sıxışdırılması planı
Əldə olunan məlumata görə, Paşinyan hökuməti son aylarda sistemli şəkildə kilsə daxilində Rusiyaya bağlı qrupları, rusiyapərəst oliqarx şəbəkələrini,
Kreml xəttini dəstəkləyən siyasi fiqurları zərərsizləşdirməyə yönəlik addımlar atır. Bu proses həm də Ermənistanın Rusiya orbitindən kənara çıxması üçün daxili təmizləmə əməliyyatı kimi xarakterizə olunur.
Samvel Karapetyanın həbsi də məhz bu strategiyanın davamıdır. Onun kilsəyə dəstək məqsədilə yaratdığı “По-нашему” hərəkatı da Paşinyan hakimiyyəti üçün Moskvanın siyasi təzyiq rıçağı kimi qiymətləndirilir.
Mxitaryanın çıxışı – Kreml ritorikasının davamı
Karapetyanın həbsi ilə bağlı hərəkat təmsilçisi, vəkil Ruben Mxitaryanın səsləndirdiyi ittihamlar da İrəvandakı rusiyapərəst dairələrin informasiya kampaniyası kimi dəyərləndirilir.
Mxitaryanın özü Gümrüdə – Rusiyanın hərbi bazasının yerləşdiyi şəhərdə – Kreml yönümlü qrupların aktiv olduğu mühitdə tanınır. Onun Karapetyanın müdafiəsinə qalxması isə Moskva yanlılarının hökumətə təzyiq cəhdinin tərkib hissəsi kimi görülür.
Ermənistan Rusiyanın təsir şəbəkəsini sökür
Samvel Karapetyanın artıq 5 aydır həbsdə saxlanılması və müddətin daha iki ay uzadılması hüquqi suallar doğursa da, siyasi fonu açıqdır:
• Paşinyan hökuməti Ermənistanın geopolitik xəttini dəyişdirmək üçün Kremlin dayaqlarını sistemli şəkildə sıradan çıxarır;
• Karapetyan bu şəbəkədə kilsə–biznes–siyasət triadasının ən güclü fiqurlarından biri sayılır;
• Ermənistan daxilində gedən proseslər Paşinyan–Moskva qarşıdurmasının növbəti, daha sərt mərhələsinin başlandığını göstərir.
Samvel Karapetyanın saxlanılması artıq təkcə bir iş adamının həbsi yox, Ermənistanın illərdir Rusiyanın nəzarətində qalmış siyasi strukturlarını dağıtmaq istiqamətində aparılan əməliyyatın rəmzinə çevrilib.
Bu proses həm də göstərir ki, İrəvan Moskva ilə münasibətlərdə yeni səhifə açmağa çalışır və Kremlin “5-ci kolonu” sayılan şəxslərin neytrallaşdırılması bu kursun əsas şərtidir.
Musavat.com
