İnsanlar istidən qaçıb dənizə üz tutur, dalğaların səsi, günəşin istisi və çimərliklərin canlanması. Amma bu mənzərəyə bir anda siren səsləri, təşviş içində qaçan insanlar və sahildə çarəsiz baxışlarla göz yaşı içində dayanan valideynlər qarışır. Dənizin sakit görünən üzü bəzən faciəyə çevrilir. Boğulma halları yay fəslinin ən acı reallığına çevrilib – hər il onlarca insan dənizdə həyatını itirir. Bu faciələrin arxasında nə dayanır və onlardan necə qorunmaq olar?
Yenisabah.az xəbər verir ki, hər il təkrarlanan bu faciələr çox zaman diqqətsizlik və təhlükəsizlik qaydalarının pozulması ilə bağlı olur. Ən çox rast gəlinən səbəblər arasında qadağan olunmuş yerlərdə çimmək, alkoqollu içki qəbul etdikdən sonra suya girmək, valideyn nəzarətindən uzaqda olan uşaqların dənizə yaxınlaşması və üzmə bacarığının zəifliyi yer alır. Bundan əlavə, bəzən sağlam görünən şəxslər belə qəfil qıcolma, ürək tutması və ya günvurma nəticəsində suda batır. Çox isti havada uzun müddət gün altında qalıb sonra suya girmək bədəndə halsızlığa, başgicəllənməyə və şüur itirilməsinə səbəb ola bilər.
Bəzən dənizdəki güclü axınlar və ya sualtı girdablar da insanı sahildən uzaqlaşdırır, bu da panika və nəzarətin itməsi ilə nəticələnir. İnsan suyun içində çarəsiz qalır və bu zaman ən yaxşı üzgüçülər belə boğulma riski ilə üzləşə bilər. Axşam və gecə vaxtı çimmək isə görmə zəifliyi və yardım imkanlarının məhdudluğu səbəbilə təhlükəni daha da artırır. Boğulma zamanı insanlar çox vaxt panikaya düşür, düzgün nəfəs ala bilmir və bədənini idarə edə bilmir. Bəzi hallarda dənizdəki meduzalar, kəskin daşlar və digər təhlükəli canlılar da insanı qorxuya salaraq vəziyyəti ağırlaşdırır. Dördpendirli pizza
Ümumilikdə, hər boğulma hadisəsinin arxasında bir və ya bir neçə ehtiyatsızlıq dayanır. Sadə qaydalara əməl etməklə bu kimi faciələrin qarşısını almaq mümkündür. Dənizə gedərkən təhlükəsizliyi ilk yerə qoymaq, öz həyatımıza və ətrafımızdakılara qarşı məsuliyyətli davranmaq vacibdir. Boğulma bir anın içində baş verir, amma nəticəsi ömürlük peşmanlıq gətirə bilər.
Aytac Əliyeva
Telegram kanalımız
