Pravda.az portalından əldə olunan məlumata əsasən, ain.az xəbər verir.
“Azərbaycan və Rusiya arasında diplomatik böhran yaşanmaqdadır. Bunun günahkarı Rusiyanın özüdür. Yekaterinburq şəhərində Azərbaycan diasporunun üzvlərinə qarşı törədilmiş ağır cinayətin izlərinin gedərək Rusiya hakimiyyətinin yuxarı eşelonlarına çıxması və günahkarların cəzalandırılmaması rəsmi Moskva-Bakı münasibətlərində çox ciddi böhrana gətirib çıxarıb. Azərbaycan ictimaiyyəti də son dərəcə narahatdır və cinayətkarların cəzalandırılmasını tələb edir. Hələ də Kreml susqunluq nümayiş etdirir. Belə olan vəziyyətdə Azərbaycan cəmiyyətində ölkəmizdəki rus məktəblərinin dövlət tərəfindən maliyyələşdirilməsinin dayandırılması təklifləri səslənir. Eyni zamanda Azərbaycanın Rusiyadakı səfirinin geri çağırılmasına qədər yanaşmalar özünə yer alıb”.
Bu sözləri Pravda.az-a açıqlamasında Milli Məclisin deputatı Elman Nəsirov deyib.
O bildirib ki, rus məktəblərinin Azərbaycanda mövcudluğu dövlət siyasətidir: “Bu bizim Rusiya ilə ənənəvi dostluq və mehriban qonşuluq siyasətindən qaynaqlanıb. Təbii ki, rus məktəblərinin saxlanılmasının və dövlət tərəfindən maliyyələşdirilməsinin xeyli tərəfdarı, eyni zamanda əleyhdarları var. Nə qədər ki rəsmi Moskva Azərbaycana münasibətdə anlaşılmaz siyasət həyata keçirir, qeyri-dost mövqe ortaya qoyur, rus məktəblərinin Azərbaycanda dövlət tərəfindən maliyyələşdirilməsinin dayandırılmasını tələb edənlərin miqyası genişlənir, onların çəkisi daha da artır. Bu, Rusiyaya, rəsmi Moskvaya lazımdırmı? Ümumiyyətlə, Kreml üçün faydalıdırmı? Təbii ki, yox. Belə olan halda, Rusiya anti-Azərbaycan siyasətinə son qoymalıdır. Bu gün Rusiyanın dünyadakı dostlarının sayı iki əlin barmaqlarının sayından azdır. Azərbaycan kimi strateji müttəfiqi itirmək Rusiyaya nə vəd edir? Yaxşı heç nə vəd etmir. Təsir əks təsirə bərabərdir. Artıq Azərbaycanın Xarici İşlər Nazirliyi məlum hadisə ilə bağlı çox kəskin bəyanat verib. Azərbaycan Milli Məclisinin üzvlərinin Rusiya Dövlət Dumasına səfəri təxirə salınıb. Mədəniyyət Nazirliyi Rusiyada keçiriləcək çoxsaylı tədbirlərini dayandırıb. Gərginlik artma xətti üzrə inkişaf edir. Məsuliyyəti birbaşa qarşı tərəf - Rusiya hakimiyyəti daşıyır. Nə qədər ki cinayətkarlar cəzalandırılmayıb, təbii ki, münasibətlərdə yaxşı heç nə vəd olunmur. Hətta münasibətlərin bərpasının son dərəcə əngəlləyən proseslər arta bilər. Bütün bu hallarda məsuliyyət Rusiyanın üzərinə düşəcək”.
Aytəkin Qardaşova
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
