Hökumətin avqust ayında tətbiq etdiyi ixrac qadağasına baxmayaraq, Rusiyada benzinin qiyməti artmaqda davam edir. Avqustun 12-də Sankt-Peterburq birjasında Aİ-95 markalı benzin yeni rekord qıraraq, bir ton üçün 80816 rubla (1014 dollar) çatıb. “Forbes” jurnalının Rusiya nəşrinin hesabatına görə, ilin əvvəlindən Aİ-95-in qiyməti 46 faiz, Aİ-92 isə 33 faiz artıb. Pərakəndə satışların artımı daha məhdud olsa da, ekspertlər sürətli artıma səbəb kimi mövsümi tələbat, neftayırma zavodlarında təmir işləri və Ukraynanın bəzi obyektlərə qarşı həyata keçirdiyi dron hücumlarını qeyd edirlər.
Hafta.az-ın yazdığına görə, Rusiya Energetika Nazirliyi ölkədaxili yanacağa olan tələbatın tam ödənildiyini, hasilat və daşınmaların ötən ilki səviyyədən yüksək olduğunu bildirsə də, sənaye nümayəndələri bəzi bölgələrdə yerli tədarük çatışmazlığının olduğunu bildiriblər. Krasnodardakı Afipski neft emalı zavoduna, xüsusən də məhsul yığımı dövründə dəyən ziyan həm kənd təsərrüfatı, həm də turizm üçün vacib olan yanacaq təchizatını çətinləşdirib. Bu, logistika xərclərinin artmasına və qiymətlərin daha da artmasına səbəb olub.
Ekspertlər hesab edir ki, qiymət artımında dempfer kimi tanınan subsidiya mexanizmində dəyişikliklər və iri neft şirkətlərinin bazar strategiyaları da rol oynayıb. Neftin qlobal qiymətinin aşağı düşməsi ilə şirkətlərin hökumətdən aldığı subsidiyalar azalıb. Bu itkini kompensasiya etmək üçün istehsalçılar, xüsusən də Aİ-95 seqmentində qiymətləri yüksək saxlayırlar. Bəzi analitiklər təklif edirlər ki, iri inteqrasiya olunmuş neft şirkətləri qiymət artımlarından aşağı qiymətə müstəqil yanacaqdoldurma məntəqələri əldə etmək fürsəti kimi istifadə edə bilərlər.
Bazar fəaliyyətinin spekulyativ elementlər daşıdığına dair şərhlər də var. Hökumət pərakəndə satış qiymətlərinin inflyasiyanı aşmaması üçün vəziyyəti diqqətlə izləyir. Bununla belə, üstünlük təşkil edən fikir ondan ibarətdir ki, ixrac qadağası oktyabrın sonuna qədər uzadıla bilər. Bu, bayram mövsümü və kənd təsərrüfatı fəaliyyətlərinin başa çatması ilə əlaqədar daxili bazarda təklifi saxlamaq məqsədi daşıyır.
