Son illər infarkt və insult ölüm səbəbləri arasında öz yerini qoruyur.
Bu riskləri minimuma endirmək üçün tibb dünyasında çeşidli araşdırmalar aparılır. Artıq insanın gözünə baxaraq onun infarkt və ya insult riskini dəyərləndirmək mümkün olacaq. Belə ki, göz dibinin sadə rəqəmsal fotoşəkili növbəti 10 il ərzində infarkt və ya insult riskini dəqiq proqnozlaşdıra bilər.
“Cebehinfo.az” xəbər verir ki, Bu, Dandi Universitetinin (Şotlandiya) alimlərinin gəldiyi nəticədir.
Göz dibi, torlu qişa və optik sinir başını əhatə edən lensin qarşısındakı gözün daxili səthidir. Göz dibindən qan damarları keçir, bu da retinaya qida verir. Beyinə məlumat ötürən optik sinir də burada yerləşir.
Bu strukturların hər hansı bir dəyişməsi və ya zədələnməsi yalnız görmə keyfiyyətinə mənfi təsir göstərmir, həm də digər patologiyaların əlamətləri ola bilər.
Bu məlumatları nəzərə alan alimlər süni intellektə əsaslanan alqoritm hazırlayıblar ki, bu da bir neçə saniyə ərzində fərdi ürək-damar riskini qiymətləndirə bilər. Alət retinal damarlardakı dəyişiklikləri - daralma, tıxanma və ya zədələnmə kimi - təhlil edir və onları infarkt və ya insult riski ilə müqayisə edir.
Bu, artıq 1200 könüllü üzərində sınaqdan keçirilib. Üç il fərqlə iki müayinə arasında ən çox risk artımı olanlar sonradan ürək və damar xəstəlikləri ilə 54% daha çox qarşılaşıblar.
Bir şəkil üzrə proqnozun dəqiqliyi 70%-ə çatıb. Klassik risk faktorları və genetik meyil haqqında məlumatı bura əlavə edərkən bu rəqəm 73% olub. Müəlliflər hesab edirlər ki, bu cür texnologiyalar gündəlik praktikaya, məsələn, oftalmoloqa səfərlər zamanı tətbiq oluna bilər.
Bu, risk qrupundan olan insanları əvvəlcədən müəyyən etməyə və vaxtında profilaktik tədbirlər görməyə kömək edəcək. Yəni həyat tərzinin dəyişdirilməsindən tutmuş dərmanların təyin edilməsinə qədər müxətlif vasitələr var.
