2008-ci ildə yaradılan "Victoria Beckham" moda markası illərlə maliyyə itkisi ilə üzləşib.
Valyuta.az xəbər verir ki, 2022-ci ilə qədər hər il zərər edən şirkətin ümumi itkisi 60–65 milyon funt sterlinqə (təxminən 130–140 milyon manat) yaxın olub.
Lakin 2022-ci ildən etibarən brend ilk dəfə olaraq mənfəət açıqlayıb və bu dönüşüm davamlı şəkildə genişlənməkdədir.
2022-ci ildə "Victoria Beckham" brendinin gəlirləri 44 faiz artaraq 58,8 milyon funt sterlinqə (təxminən 126 milyon manat) çatıb. Eyni zamanda, əvvəlki ildə 3,1 milyon funt (təxminən 6,6 milyon manat) olan vergi öncəsi zərər 0,9 milyon funt (təxminən 1,9 milyon manat) səviyyəsinə enib. Şirkətin əməliyyat mənfəəti də müsbətə keçib – 2022-ci ildə "adjusted EBITDA" göstəricisi +0,2 milyon funt (təxminən 430 min manat) təşkil edib.
2023-cü ildə isə brendin maliyyə göstəriciləri daha da yaxşılaşıb. İllik gəlir 52 faiz artaraq 89,1 milyon funt sterlinqə (təxminən 190 milyon manat) yüksəlib. "Adjusted EBITDA" göstəricisi 1,8 milyon funt (təxminən 3,8 milyon manat) olub. Əməliyyat zərəri isə cəmi 0,2 milyon funt (təxminən 430 min manat) təşkil edib ki, bu da əvvəlki illərlə müqayisədə ciddi azalmadır. İl üzrə vergi öncəsi zərər 2,9 milyon funt (təxminən 6,2 milyon manat) səviyyəsində olub.
Brendin bu uğurlu dönüşündə bir neçə əsas faktor rol oynayıb. CEO Mari Leblancın rəhbərliyi ilə şirkət struktur islahatlarına başlayıb, iki alt brend birləşdirilib, əməliyyat və inzibati xərclər azaldılıb. Bununla yanaşı, yüksək mənfəət marjlı məhsullara – xüsusən ətir və dəri aksesuarlarına diqqət artırılıb.
2022-ci ildə təqdim edilən dəri çantalar və kəmərlər yüksək satış göstəricisi ilə seçilib. Məsələn, kəmərlərin satışında tələbat ilin sonuna qədər 13 dəfə artıb. Eyni zamanda, orta qiyməti 850 funt (təxminən 1 800 manat) olan midi paltarlar onlayn satışın ən çox satılan məhsulları sırasında yer alıb. Gözəllik məhsullarına – kontur stilizatorları, qazlı eyeliner və yeni ətir seriyası – maraq da əhəmiyyətli dərəcədə artıb. Bu seqmentdə müştəri sayı bir il ərzində üç dəfə çoxalıb.
2024-cü ilin martında brendə "Dior" moda evindən gələn Sybille Darricarrère Lunel CEO təyin olunub. Bu dəyişiklik də "Victoria Beckham" brendinin daha dayanıqlı və peşəkar idarə olunmasına yönəlik addım kimi qiymətləndirilir.
Hazırda brend uzun illər davam edən zərərlə yox, sabit gəlirli fəaliyyəti ilə seçilir. Onlayn və pərakəndə kanalların genişləndirilməsi, yüksək marjlı məhsullara fokus və peşəkar rəhbərlik strategiyası "Victoria Beckham" markasının iqtisadi gələcəyini daha da möhkəmləndirir.
Mayya Hüseynova
