Minifutbol millimiz çexlərə qalib gəldi, yarımfinala yüksəldi – ARENA.AZ

Minifutbol üzrə Azərbaycan milli komandası Slovakiyada təşkil edilmiş Avropa çempionatında yarımfinal mərhələsinə vəsiqə qazanıb.

Arena.az xəbər verir ki, Elşad Quliyevin baş məşqçisi olduğu kollektiv 1/4 final mərhələsində Çexiya yığması ilə üz-üzə gəlib.

“Tipos Arena”da keçirilmiş qarşılaşma millimiz üçün uğurlu alınıb. Futbolçularımız bu dəfə 5:2 hesablı qələbəyə seviniblər. Yığmamızın qollarını dubla imza atmış Eşqin Tağıyev, eləcə də Təmkin Xəlilzadə, Ramiz Çovdarov və Məhəmməd Xəlilov vurublar.

Raundun digər matçlarında Macarıstan yığması Bolqarıstanı (4:0), Ukrayna millisi Gürcüstanı (4:0), Serbiya seçməsi isə Rumıniyanı (6:4) məğlub edib.

Bu oyunlardan sonra Avropa çempionatında yarımfinal cütləri müəyyənləşib. Finala gedən yolda Macarıstan yığması Ukraynaya, Azərbaycan millisi isə Serbiyaya rəqib olub.

Xatırladaq ki, minifutbol üzrə Avropa çempionatında yarımfinal mərhələsinin matçları iyunun 3-də, final görüşü isə ayın 4-də baş tutacaq.