Cəlal Hüseynov mövsümün son matçında 63 dəqiqə oynadı

Futbol üzrə Azərbaycan millisinin mərkəz müdafiəçisi Cəlal Hüseynov Bolqarıstanın “Arda” komandasının heyətində növbəti matçına çıxıb.

Arena.az xəbər verir ki, Cəlalın komandası Bolqarıstan çempionatının 2025/2026-cı illər mövsümünün sonuncu – 36-cı turu çərçivəsində “Çerno More” ilə qarşılaşıb.

“Arda” səfərdə baş tutmuş bu oyundan qələbə ilə ayrılıb – 3:2. Hüseynov start heyətdə meydana çıxıb və 63-cü dəqiqədə əvəzlənib.

“Arda” 36 oyunda topladığı 54 xalla 16 iştirakçı arasında 6-cı yeri tutub. Komanda 15 qələbə qazanıb, 9 heç-heçə edib, 12 məğlubiyyətə üzülüb. “Arda” Avropa Konfrans Liqasına vəsiqə qazanmış Plovdiv “Lokomotiv”indən cəmi 1 xal geri qalıb.

Xatırladaq ki, “Zirə”nin yetirməsi olan Cəlal Hüseynov Bolqarıstan təmsilçisi ilə 2023-cü ilin iyun ayında 3 illik müqavilə imzalayıb. Azərbaycanlı futbolçu bu komandada 85 rəsmi oyuna çıxıb, 5 qol vurub. Cəlal 2024/2025-ci illər mövsümünü icarə əsasında “Şamaxı”da keçirsə də, ötən ilin yayında yenidən Bolqarıstan klubuna qayıdıb.

Hüseynov 2021-ci ilin noyabrında debüt etdiyi Azərbaycan milli komandasının heyətində 9 oyuna çıxsa da, məhsuldar fəaliyyəti ilə yadda qalmayıb.