"Sumqayıt" 2026-cı ilə uğurlu start verə bilmədi.
Qış təlim-məşq toplanışında bütün oyunları uduzan "Kimyaçılar" bu dəfə eyni şeyi rəsmi görüşdə yaşadı.
Saşa İliçin komandası "Turan Tovuz"la bacarmadı - 1:2.
Hətta bölgə klubunun ev oyununu "Sumqayıt"a məxsus Mehdi Hüseynzadə adına Sumqayıt şəhər stadionunda keçirməsi də işə yaramadı.
Xüsusilə birinci yarıda tovuzlular çox üstün təsir bağışladı.
Gənc qapıçı Xəyal Fərzullayev 4 əla seyvlə hesabın böyüməsinə imkan vermədi.
Serbiyalı mütəxəssisin arxa xətdə olan boşluqları aradan qaldıra bilmədiyi aydın görünürdü.
İndi isə qarşıdan liqanın sonuncusu "Karvan-Yevlax"la səfər oyunu var.
Startda məğlubiyyət, yol verilən ciddi xətalar Yevlax səfərində də psixoloji olaraq sumqayıtlı oyunçulara təsir edə bilərmi?
Komandanın əsas fiqurlarından biri olan xorvatiyalı yarımmüdafiəçi Aleksa Yankoviç Sportinfo.az-a açıqlamasında suala cavab olaraq bunları dedi:
"Düşünmürəm ki, "Turan Tovuz"a uduzmaq bizə çox təsir edər.
Dəfələrlə məğlub olduğumuz oyundan sonra qalib gəlmişik. Və yaxud da əksi olub.
Hər oyuna xüsusi hazırlaşırıq. "Karvan-Yevlax"a qarşıda ən yaxşı oyunumuzu göstərməyə çalışacağıq".
XANOĞLAN
