“Keşlə”nin (hazırkı “Şamaxı”) sabiq futbolçusu Zurab Xizanişvili ölkəsi Gürcüstanda baş məşqçi təyin olunub.
Sportinfo.az yerli mətbuata istinadən xəbər verir ki, 44 yaşlı mütəxəssis U-19 yığmasının sükanı arxasına keçib.
Daha əvvəl Gürcüstanın U-21 və əsas millisində köməkçi məşqçi, U-16-da isə baş məşqçi kimi fəaliyyət göstərmiş Xizanişviliyə Gürcüstan Futbol Federasiyasının inamı artıb. Bunun nəticəsidir ki, o, U-19 millisinin baş məşqçisi təyin edilib.
Xizanişvili baş məşqçi kimi ilk beynəlxalq təcrübəsini martda keçəcək. Onun komandası Avropa çempionatının seçmə mərhələsində İslandiya və Monteneqro seçmələri ilə qarşılaşacaq.
Zurab Xizanişvili 2015-2017-ci illərdə ölkəmizdə “Keşlə”nin formasını geyinib. Zəngin karyeraya malik sabiq müdafiəçi əsasən İngiltərədə çıxış edib.
