Finlandiyanın Rovaniemi hava limanında polis növbəti uçuş ləğvi dalğasından sonra asayişi qorumağa məcbur olub. Uçuşların ləğv edilməsinə səbəb təyyarədəki texniki nasazlıqlar və əlverişsiz hava şəraitidir.
“İki sahil” xəbər verir ki, uçuşların ləğv edilməsi təxminən 600 sərnişinə təsir edib və səyahətçilər arasında emosional reaksiyalara səbəb olub.
Təhlükəsizliyi qorumaq üçün polis sərhədçilərlə birlikdə hava limanına gəlib. Vəziyyət həmin gün gecə saatlarında sabitləşib; heç bir iğtişaş qeydə alınmayıb və heç kim həbs olunmayıb. Sərnişinlərin bir hissəsi hotellərdə və kirayə mənzillərdə yerləşdirilib. Lakin digərləri gecəni hava limanı binasında keçirməyə məcbur olub. Orada onlara döşəklər və yorğanlar verilib.
Hakimiyyət orqanlarının məlumatına görə, hava nəqliyyatında fasilələr hava şəraiti yaxşılaşana qədər davam edə bilər.
Oxşar hallar artıq dekabrın sonlarında baş vermişdi. Həmin vaxt fırtına yüzlərlə sərnişini hava limanında gecələməyə məcbur etmiş, bəziləri isə şaxtalı havada çöldə növbəyə durmuşdu.
Qeyd edək ki, Rovaniemi Finlandiyanın ən məşhur qış turizm məkanlarından biridir. Şəhər Santa Klausun rəsmi vətəni hesab olunur və hər il, xüsusən də qış mövsümündə çox sayda turisti qəbul edir.
