Ukrayna ilə müharibə zamanı Rusiyada milyarderlərin sayı rekord səviyyəyə çatıb, lakin Vladimir Putinin 25 illik hakimiyyəti ərzində Rusiya Federasiyasının oliqarxlar kimi tanınan varlı və nüfuzlu insanları demək olar bütün siyasi təsirlərini itiriblər...
Poliqon xəbər verir ki, bu barədə BBC yazıb.
"Bütün bunlar Rusiya prezidenti üçün yaxşı xəbərdir. Qərb sanksiyaları super varlıları onun rəqiblərinə çevirə bilmədi və onun "kök-çubuq" siyasəti onları səssiz tərəfdarlara çevirdi", deyə nəşr qeyd edib.
Xüsusilə keçmiş bank milyarderi Oleq Tinkov qamçının necə işlədiyini dəqiq bilir. "Instagram" səhifəsində müharibəni "dəlilik" adlandırdığı gündən bir gün sonra rəhbərləri ilə Kreml nümayəndələri əlaqə saxlayıblar. Daha sonra onlara deyilib ki, Rusiyada ikinci ən böyük bank olan "Tinkoff" bankı, təsisçisi ilə bütün əlaqələr kəsilməsə, milliləşdiriləcək.
"Qiymət barədə danışıqlar apara bilmədim. Bu, girov kimi idi - təklif olunanı alırsan. Danışıq apara bilmədim", deyə Tinkov "The New York Times" qəzetinə bildirib.
Daha sonra, bir həftə ərzində, hazırda Rusiyanın beşinci ən varlı iş adamı olan Vladimir Potaninlə əlaqəli bir şirkət bankı satın aldığını elan edib. Tinkovun sözlərinə görə, bank əsl dəyərinin yalnız 3%-nə satılıb.
Milyarder keçmiş sərvətinin təxminən 9 milyard dollarını itirib və Rusiyadan qaçıb.
"Bu, Putinin prezident olmasından əvvəlki vəziyyətdən çox fərqlidir. Sovet İttifaqının dağılmasından sonrakı illərdə bəzi ruslar əvvəllər dövlətə məxsus nəhəng müəssisələri ələ keçirməklə və ölkənin yeni yaranan kapitalizmindən istifadə etməklə inanılmaz dərəcədə varlandılar. Onların yeni qazandıqları sərvət onlara siyasi qarışıqlıq dövründə təsir və güc qazandırdı və onlar oliqarx kimi tanınmağa başladılar", deyə BBC xatırladıb.
Rusiyanın ən güclü oliqarxı Boris Berezovskinin 2000-ci ildə Putinin prezidentliyə yüksəlişini təşkil etdiyi və illər sonra bunun üçün üzr istədiyi deyilir.
"Mən onda gələcəkdə acgöz bir tiran və qəsbkar, azadlığa xor baxacaq və Rusiyanın inkişafını dayandıracaq bir adam görmədim", deyə o, 2012-ci ildə yazırdı.
Beləliklə, Putin Ukraynaya tammiqyaslı işğalın başlamasından bir neçə saat sonra Rusiyanın ən varlı adamlarını Kremldə topladıqda, onlar sərvətlərinin ciddi itkilərə məruz qalacağını bilsələr belə, ona qarşı çıxmaq üçün heç nə edə bilməyiblər.
Rusiya lideri o zaman onlara demişdi: "Ümid edirəm ki, bu yeni şəraitdə biz eyni dərəcədə yaxşı və heç də az effektiv olmayan şəkildə birlikdə işləyəcəyik".
Görüşdə iştirak edən jurnalistlərdən biri toplaşan milyarderləri "solğun və yuxusuz" adlandırıb.
Nəşr vurğulayır ki, işğaldan bəri Rusiyanın demək olar bütün meqa-zənginləri susub və buna qarşı açıq şəkildə çıxış edən azsaylı insanlar ölkələrindən qaçmağa və sərvətlərinin əhəmiyyətli bir hissəsini geridə qoymağa məcbur olublar.
BBC əlavə edir ki, Rusiyanın ən varlı adamları Putinin hərbi əməliyyatlarında əsas rol oynayır və onların bir çoxu, o cümlədən 24 fevral 2022-ci ildə Kremlə çağırılan 37 iş adamı, Qərb sanksiyalarının hədəfinə çevrilib. Onlardan bəziləri pulları ilə Qərbə qaçmağı düşünsəydilər belə, sanksiyalar bunu qeyri-mümkün edərdi.
"Qərb rus milyarderlərini bayraq ətrafında birləşdirmək üçün əlindən gələni etdi", deyə Avropa Siyasət Təhlili Mərkəzindən (CEPA) Aleksandr Kolyandr izah edib.
Ukraynanın işğalından sonra xarici şirkətlərin Rusiyadan çəkilməsi, Kremlə sadiq iş adamları tərəfindən tez bir zamanda doldurulan bir boşluq yaratdı və onlara yüksək gəlirli aktivləri ucuz qiymətə almağa icazə verilib. Rusiya-Avrasiya Karnegi Mərkəzindən Aleksandra Prokopenkonun sözlərinə görə, bu, yeni "nüfuzlu və aktiv sadiqlər ordusu" yaradıb.
O, vurğulayıb ki, onların gələcək rifahı Rusiya ilə Qərb arasındakı qarşıdurmanın davam etməsindən asılıdır və ən böyük qorxuları əvvəlki sahibinin geri qayıtmasıdır.
Poliqon.info
