Yasamal rayonu, Akim Abbasov küçəsi, 119 ünvanında yerləşən avtobus dayanacağında təhlükəli vəziyyət yaranır.
NOCOMMENT.az xezerxeber.az-a istinadən xəbər verir ki, ərazidə hər gün yüzlərlə sakin 17 nömrəli marşrutdan istifadə edir.
Ancaq sərnişinlər eni təxmini bir metr olan səkinin üzərində toplaşaraq avtobus gözləməyə məcbur olur.
Bu isə həm yolun hərəkət hissəsinə yaxınlıq, həm də piyada sıxlığı nəzərə alınanda təhlükə yaradır.
Sakinlər bildirir ki, xüsusən yağıntılı havalarda burada dayanıb avtobus gözləmək çətin olur.
Sakinlərin sözlərinə görə, sözgedən dayanacağın arxa hissəsində kiçik göl var. Buna görə də ərazi hasarlanıb və dayanacaq illərdir qurulmayıb. Bu səbəbdən həm yaşlılar, həm də məktəblilər üçün burada gözləmək çətindir.
Hazırda yüzlərlə sakin bu dayanacaqdan istifadə edir və hamının ortaq tələbi təhlükəsiz, qapalı və standartlara uyğun dayanacağın quraşdırılmasıdır.
Məsələ ilə bağlı Yerüstü Nəqliyyat Agentliyindən “Xəzər Xəbər”ə bildirildi ki, avtobus dayanacaq pavilyonları dövlət standartına əsasən, dayanacaq məntəqəsində səkinin eni minimum 3 metrdən az olmayan və gün ərzində 20 sərnişindən çox minib-düşmə həyata keçirilərsə, həmin məntəqədə pavilyonun qoyulmasına yol verilir. Sözügedən ərazidə səki infrastrukturu avtobus dayanacağı üçün pavilyon quraşdırmağa uyğun deyil.
Xezerxeber.az mövzu ilə bağlı daha ətraflı videomaterialı təqdim edir.
