Kreml dairələrində “Cənubi Qafqaz üzrə ideoloji şərhçilərdən biri” kimi təqdim olunan Aleksandr Burenkov yenidən Azərbaycanın Qarabağ üzərində suverenliyinin bərpası ilə bağlı qərəzli və əsassız şərhlərlə çıxış edib.
Musavat.com xəbər verir ki, o, şəxsi teleqram kanalında dərc etdiyi analitik yazıda 2020-ci ildə başa çatan 44 günlük müharibə və 2023-cü ilin sentyabrında keçirilmiş lokal anti-terror tədbirlərinin nəticələrini “Rusiyanın strateji səhvlərinin nəticəsi” kimi təqdim etməyə çalışıb.
Burenkov iddia edir ki, keçmişdə “Dağlıq Qarabağ Respublikası” adlandırılan separatçı qurumın mövcudluğu Rusiya üçün Cənubi Qafqazda “forpost” funksiyasını yerinə yetirib. O, bölgəni tarixi proseslərin təhrif edilmiş interpretasiyası əsasında “200 illik Rusiyanın təsir zonası” kimi təqdim edərək, Azərbaycan ərazisində yaradılmış və beynəlxalq hüquqla tanınmayan silahlı separatçı rejimin saxlanılmasını strateji baxımdan Moskva üçün guya əlverişli hesab edir.
Musavat.com xatırladır ki, Burenkov daha əvvəl də bənzər mövzularda çıxış edərək, Azərbaycanın beynəlxalq hüquqa əsaslanan mövqeyinə dair sistemli şəkildə qərəz nümayiş etdirib. Onun bu dəfəki şərhində də diqqəti çəkən əsas məqam, Azərbaycanın öz ərazi bütövlüyünü bərpa etməsini “səhv proses”, rus hərbi kontingentinin isə bu prosesdə “fasiləsiz rol oynamalı” olduğu iddiasıdır.
Halbuki, Azərbaycan 2020-ci ildə və 2023-cü ilin sentyabrında keçirdiyi əməliyyatlarda BMT Nizamnaməsinə, dövlət suverenliyi prinsipinə və beynəlxalq hüquq normalarına əsaslanıb. Qarabağda fəaliyyət göstərən separatçı silahlı birləşmələrin ləğvi Azərbaycan Konstitusiyasının tələbi və dövlətin suverenlik hüququnun birmənalı olaraq icrası olub.
Burenkovun arqumentlərindəki paradoks ondan ibarətdir ki, o, Azərbaycanda separatizmin dəstəklənməsini legitimləşdirməyə çalışdığı halda, Rusiyanın öz daxilində analoji proseslərin baş verməsini “dövlətə təhdid” kimi qiymətləndirir. Bu isə Moskvanın uzun illər Cənubi Qafqaz siyasətində tətbiq etdiyi ikili standartların əsas konturlarını açıq şəkildə üzə çıxarır.
Hazırkı geosiyasi vəziyyət isə göstərir ki, artıq region balansı dəyişib. Azərbaycan Türkiyə və Pakistanla müttəfiqlik münasibətlərini genişləndirərək təhlükəsizlik arxitekturasında yeni strateji format yaradıb. Bu format həm regional güc mərkəzlərini, həm də beynəlxalq təhlükəsizlik sistemini dəyişən əsas amillərdən biridir. Azərbaycanın enerji, nəqliyyat, hərbi və diplomatik sahələrdə güclənməsi, həmçinin Qərb dövlətləri və NATO ilə əməkdaşlığın dinamik artımı göstərir ki, Bakı təkcə regional deyil, həm də geniş Avrasiya məkanında müstəqil və çoxvektorlu siyasətin aparıcı aktoruna çevrilib.
Beləliklə, separatçı rejimin ləğvi nə təsadüfi proses, nə də kənar təsirin nəticəsi olmayıb. Bu, Azərbaycanın sistemli şəkildə apardığı dövlətçilik strategiyasının məntiqi yekunu, tarixi ədalətin və beynəlxalq hüququn bərpası, həmçinin regionda yeni təhlükəsizlik modelinin formalaşması ilə bağlı prosesin təbii mərhələsidir.
Musavat.com
