ain.az xəbər verir, Oxumeni.az saytına əsaslanaraq.
Kamerunda 92 yaşlı Pol Biya prezident seçkilərinin qalibi elan edildi
Dünyanın ən yaşlı dövlət başçısı, Kamerun prezidenti 92 yaşlı Pol Biya səslərin 53,66%-ni toplayaraq yenidən seçkilərdə qalib gəldi.
“France-Presse” aqentliyinin məlumatına görə, bunu ölkənin Konstitusiya Məhkəməsi açıqlayıb.
Biya 1982-ci ildən bəri Kameruna rəhbərlik edir. Bu, onun səkkizinci prezidentlik müddətidir.
Seçkilər 12 oktyabrda keçirilib və rəsmi nəticələr 15 gün sonra hesablanıb. Seçki komissiyasının məlumatına görə, səsvermə sakit keçib.
Kampaniya zamanı Biya yalnız bir mitinq keçirib və on gün Avropada qalıb. Seçkilərdə doqquz namizəd, o cümlədən vəzifələrini tərk edən iki keçmiş nazir iştirak edib.
Müxalifət lideri Moris Kamto yarışdan kənarlaşdırılıb və bu, hakimiyyətin rəqiblərini sıradan çıxardığına dair tənqidlərə və ittihamlara səbəb olub. 2018-ci ildəki son seçkilərdən sonra Kamto artıq qələbə qazandığını iddia etmiş və kütləvi etirazlar təşkil etmişdi.
Həqiqi rəqabətin olmamasına baxmayaraq, müxalifət namizədi İsse Çiroma Bakari nəticələr açıqlanmamışdan əvvəl özünü qalib elan edib. Rəsmi rəqəmlərə görə, o, səslərin 35,2%-ni toplasa da, tərəfdarları saxtakarlıq olduğunu iddia ediblər.
Kamerunlu politoloq İmmanuel Uana BBC-yə bildirib ki, "Biya üçün hakimiyyəti qorumaq həmişə prioritet olub - çox vaxt vətəndaşların həyatını yaxşılaşdırmaq bahasına".
Kamerun əhalisinin 60%-dən çoxu 25 yaşdan kiçikdir və əksəriyyəti heç vaxt başqa bir prezident tanımayıb. İnflyasiya, korrupsiya, işsizlik və təhlükəsizlik problemləri səbəbindən ölkədə narazılıq artır.
Almaz Həsənli
Hadisənin gedişatını izləmək üçün ain.az saytında ən son yeniliklərə baxın.
