Gəncə, 23 oktyabr, Elcan Məmmədov, AZƏRTAC
Azərbaycan Texnologiya Universiteti ilə Gəncə Memorial Hospitalı arasında əməkdaşlıq əlaqələri qurulub. Bu əməkdaşlıq çərçivəsində universitetin professor-müəllim heyəti, digər əməkdaşları və tələbələri üçün klinikada endirimli qiymətlərlə tibbi müayinə və xidmətlərdən yararlanmaq imkanı yaradılıb.
Universitetdən AZƏRTAC-ın bölgə müxbirinə verilən məlumata görə, tərəflər arasında bağlanmış müqaviləyə əsasən, Gəncə Memorial Hospitalı Texnologiya Universitetinin əməkdaşlarına geniş spektrdə – laborator analizlər üçün 25%, rentgen və ultrasəs müayinələri, terapevtik və ixtisaslaşmış tibbi xidmətlər üzrə isə 20% güzəştlər təqdim edəcək.
Əməkdaşlığın məqsədi universitetin kollektivi və tələbələri üçün sağlamlıq imkanlarının əlçatanlığını artırmaq, profilaktik müayinələrin səmərəliliyini təmin etmək və sağlam həyat tərzinin təşviqinə töhfə verməkdir.
