1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Böyük Britaniyada "Pinat" ləqəbli ev pişiyi sevimli pabını ziyarət etmək üçün iki dəfə 40 km-dən çox yolu qət edib.
Oxu.Az-ın BBC-yə istinadən verdiyi xəbərə görə, Linkolnşirdən olan dördayaqlı səyahətçi ilk dəfə bu ilin iyulunda Nottinqemdəki "Vat & Fiddle" pabında peyda olub.
İnsan üçün belə uzun sayılan məsafəni qət edən "Pinat" tez bir zamanda məşhurlaşıb. Ev heyvanı pabın ab-havasından həzz alaraq ziyarətçilərlə tanış olarkən, müəssisənin əməkdaşları sosial şəbəkələrdə real axtarış əməliyyatına başlayıb, qeyri-adi qonağın sahiblərini tapmağa çalışıblar.
Pişiyin sahiblərini internet vasitəsilə tapmaq üçün bir neçə uğursuz cəhddən sonra pabın işçiləri kömək üçün baytarlara müraciət ediblər. İmplantasiya edilmiş mikroçip sayəsində mütəxəssislər "Pinat"ın ailəsi ilə əlaqə saxlaya biliblər. Maraqlıdır ki, pişik qaçdıqdan yalnız bir ay sonra evə qayıdıb. "Tətil" zamanı "Pinat", hətta ilk dəfə doğum gününü evdən kənarda, lakin yeni dostların əhatəsində qeyd edib.
Evə qayıtdıqdan bir neçə həftə sonra təşəbbüskar pişik yenidən qaçıb və sanki kompasla birbaşa həmin paba gedib.
"Deyəsən, "Pinat" bonus xallarından istifadə etmək üçün qayıdıb!" - deyə müəssisənin işçiləri yumorla bildiriblər.
"Vat & Fiddle" şirkətinin əməkdaşları qeyri-adi qonaqlarını yenidən görməkdən şad olsalar da, sahibləri ilə əlaqə saxlayıb və ev heyvanını onlara qaytarıblar. Onlar bu dəfə "Pinat"ın evdə qalacağına ümid etdiyini bildiriblər.
