Oxu.az saytından verilən məlumata əsasən, ain.az məlumatı açıqlayır.
Ermənistanın baş naziri Nikol Paşinyan avqustun 8-də imzalanan Vaşinqton razılaşması ilə Ermənistanın yeni inkişaf mərhələsinə qədəm qoyduğuna əmindir.
Oxu.Az-ın "Armenpress"ə istinadən xəbərinə görə, Paşinyan hökumətin iclasındakı çıxışında belə bir əminlik ifadə edib.
Baş nazir əvvəlcə bütün hökumət üzvlərini Azərbaycan ilə Ermənistan arasında sülhün bərqərar olması münasibətilə təbrik edib.
"Biz hökumət ilə, genişləndirilmiş Təhlükəsizlik Şurası, respublika prezidenti, parlamentdəki həmkarlarımız, eləcə də "Vətəndaş sazişi" fraksiyası ilə bir sıra müzakirələr apardıq. Vaşinqtona getməzdən əvvəl mən onları dəvət etdim ki, məsləhətləşmələr aparaq, mətnləri müzakirə və təhlil edək. Belə qənaətə gəldik ki, bu addımın atılması zəruridir", - deyə Nikol Paşinyan bildirib.
O, görülən işlərə və prosesi dəstəklədiklərinə görə bütün hökumət üzvlərinə təşəkkür edib və bunun onların işinin xülasəsi deyil, başlanğıcı olduğunu vurğulayıb.
"Mən əminəm ki, bu addımla biz yeni inkişaf gündəliyinə, inkişafın yeni mərhələsinə qədəm qoyduq və burada işimizin məzmunu və enerjisi daha yüksək olmalıdır. Bizim işimizin səmərəliliyi daha yüksək olmalıdır. Qarşıda çox iş var. Bu, konstruktiv, dinc, yaradıcı işdir. Biz hamımız mümkün qədər bu işə diqqətimizi cəmləməliyik", - deyə Paşinyan əlavə edib.
O, həmçinin vətəndaşların hökumətin nə etdiyini və bunu niyə etdiyini anlamaları üçün ictimai ünsiyyətin vacibliyini də qeyd edib.
"Əgər uğurların genezisi ictimaiyyətə aydın deyilsə, ən böyük nailiyyətlər belə problemlidir", - deyə Paşinyan bildirib.
O əlavə edib ki, yaxın vaxtlarda hökumət üzvləri ictimai kommunikasiyaya daha çox diqqət yetirməlidirlər.
Nikol Paşinyan bütün hökumət üzvlərinə sülhün yeni, yaradıcı mərhələsində uğurlar arzulayıb.
Daha ətraflı məlumat və yeniliklər üçün ain.az saytını izləyin.
