ABŞ administrasiyası danışıqlar prosesində həm Putin, həm də Zelenski ilə ayrı-ayrılıqda, daha sonra isə birgə görüşləri planlaşdırır...
Poliqon xəbər verir ki, ABŞ prezidenti Donald Trampın Ukrayna münaqişəsinin həlli ilə bağlı strategiyası üç mərhələdən ibarətdir. Axios portalının məlumatına görə, administrasiya rəsmiləri bu planı ictimaiyyətə açıqlayıblar.
Birinci mərhələdə Rusiya prezidenti Vladimir Putinin ABŞ-la danışıqlar masasına gətirilməsi nəzərdə tutulur. Bu görüşdə sülhə doğru atıla biləcək addımlar müzakirə olunacaq.
İkinci mərhələdə Ukrayna prezidenti Vladimir Zelenskinin ABŞ-la danışıqlara cəlb edilməsi planlaşdırılır. Burada da məqsəd atılacaq sülh addımlarını müzakirə etməkdir.
Üçüncü mərhələdə isə həm Putin, həm də Zelenski ABŞ-ın vasitəçiliyi ilə eyni masa arxasında görüşməli və bütün məsələləri birgə müzakirə etməlidirlər.
Müşahidəçilərin fikrincə, Tramp administrasiyasının bu planı ABŞ-ın Ukrayna böhranında əsas vasitəçi rolunu gücləndirmək məqsədi daşıyır. Bununla yanaşı, bu yanaşma həm Moskvanın, həm də Kiyevin mövqelərini balanslaşdırmağa yönəldilmiş addım kimi qiymətləndirilir.
Ekspertlər hesab edirlər ki, əgər bu strategiya uğurla həyata keçirilərsə, ABŞ beynəlxalq arenada yeni diplomatik qələbə əldə etmiş olacaq. Lakin prosesin uğuru həm Putinin, həm də Zelenskinin masaya əyləşməyə razılıq verməsindən asılı olacaq.
Poliqon.info
