Bakı, 14 avqust, AZƏRTAC
Fransanın PSJ komandası son 20 ildə ilk dəfə bir oyunda 84-cü dəqiqədən sonra iki top fərqini aradan qaldırmağı bacarıb.
AZƏRTAC Beynəlxalq Futbol Tarixi və Statistikaları Federasiyasının (IFFHS) rəsmi saytına istinadən xəbər verir ki, Paris təmsilçisi bunu UEFA Superkuboku uğrunda İngiltərənin "Tottenhem" klubu ilə keçirilmiş matçda reallaşdırıb.
Görüşün 84-cü dəqiqəsinə qədər iki top fərqi ilə geridə olan Luis Enrikenin baş məşqçisi olduğu kollektiv 85-ci dəqiqədə Li Kan İn, 90+4-cü dəqiqədə isə Qonsalu Ramuşun vurduğu qolla hesabı bərabərləşdirib – 2:2.
Komanda buna sonuncu dəfə 2005-ci ilin mayında nail olub. Həmin vaxt Fransanın “Soşo” klubu ilə matçda Armand 88-ci, Yepes isə 89-cu dəqiqədə vurduğu qollarla hesabı 2:2 etmişdi.
Qeyd edək ki, PSJ – “Tottenhem” görüşünün əsas vaxtı 2:2 hesablı heç-heçə ilə başa çatıb. Penaltilər seriyasında daha dəqiq (4:3) oynayan PSJ Superkubokun qalibi olub.
