İyulun 17-18-də Azərbaycan Respublikasının xarici işlər nazirinin müavini Elnur Məmmədov Azərbaycan-Vyetnam iqtisadi-ticarət və elmi-texniki əməkdaşlıq üzrə Hökumətlərarası Komissiyanın 3-cü iclasında iştirak etmək məqsədilə Hanoy şəhərinə səfər səfər edərək, iclasda məruzə ilə çıxış edib.
XİN-dən verilən məlumata görə, səfər çərçivəsində nazir müavini həmçinin Vyetnamın xarici işlər nazirinin müavini xanım Le Thi Thu Hanq ilə görüşüb. Görüşdə cari ilin 21 aprel tarixində Bakı şəhərində keçirilmiş Azərbaycan Respublikası və Vyetnam Sosialist Respublikasının Xarici İşlər Nazirlikləri arasında siyasi məsləhətləşmələrdən irəli gələn məsələlər müzakirə olunub.
Tərəflər həmçinin Azərbaycan-Vyetnam arasında siyasi, ticarət və iqtisadiyyat, energetika, kənd təsərrüfatı, nəqliyyat və humanitar sahələrdə qarşılıqlı tərəfdaşlığın genişləndirilməsi istiqamətində mövcud potensialı nəzərdən keçiriblər.
7-8 may tarixlərində Vyetnam Kommunist Partiyası Mərkəzi Komitəsinin Baş katibi To Lamın ölkəmizə dövlət səfəri ilə əlaqələrin yeni mərhələyə, Strateji Tərəfdaşlıq səviyyəsinə yüksəldiyi vurğulanıb, parlamentlərarası əlaqələrin möhkəmləndirilməsinin vacibliyi qeyd olunub.
