ABŞ-ın çip istehsalçısı olan "Nvidia" Çinə süni intellekt çiplərinin satışını yenidən başlatmaq üçün müraciət etdiyini açıqlayıb.
Valyuta.az xəbər verir ki, şirkətin verdiyi məlumata görə, ABŞ hökumətindən tələb olunan lisenziyaların yaxın günlərdə əldə olunması gözlənilir və bu prosesdən dərhal sonra çatdırmalara başlanacaq.
Bu addım, Tramp administrasiyası dövründə tətbiq olunan ixrac məhdudiyyətlərindən sonra atılıb. Qərarın ləğv edilməsi isə "Nvidia"nın baş direktoru Censen Huanqın aprel ayında Mar-a-Laqo-da yüksək səviyyəli bir yeməkdə iştirakından sonra baş verib. Bildirildiyinə görə, Huanqın 1 milyon dollar ödəməklə qatıldığı bu tədbirdən sonra Ağ Ev geri addım atıb və "Nvidia" ABŞ-da yeni məlumat mərkəzləri inşa etməyi öhdəsinə götürüb. Şirkət dörd il ərzində 500 milyard dollar dəyərində server sərmayəsi yatırmağı planlaşdırır.
Süni intellekt üçün ən güclü model: H20
Çinə yenidən satışa çıxarılacaq çiplərdən biri "Nvidia"nın H20 modelidir. Bu çip birbaşa süni intellektin öyrədilməsi üçün deyil, artıq öyrədilmiş modellərin gündəlik tətbiqlərdə – yəni "inference" prosesində – istifadəsi üçün nəzərdə tutulub. H20 mövcud ixrac qaydalarına əsasən Çinə qanuni şəkildə satıla biləcək ən güclü "Nvidia" çipi hesab olunur.
Şirkət, Çinə xüsusi olaraq hazırlanmış yeni "RTX Pro" çipini də təqdim edib. Bildirilib ki, bu çip bütün hüquqi tələblərə tam uyğundur və ağıllı fabriklər, logistika kimi rəqəmsal istehsal sahələri üçün ideal seçimdir.
H20 çipləri 2024-cü ilin birinci rübündə "ByteDance", "Alibaba" və "Tencent" kimi Çinli texnoloji nəhənglər tərəfindən əhəmiyyətli dərəcədə ehtiyat edilmişdi. Bu çip, Çin istehsalı alternativlərlə müqayisədə daha yüksək yaddaş bant genişliyinə malikdir və "Nvidia"nın geniş yayılmış proqram təminatı infrastrukturu ilə asanlıqla inteqrasiya oluna bilir.
Aprel ayında Tramp administrasiyası H20 satışlarına məhdudiyyət qoymuşdu. Bu qərarın səbəbi çipin texniki xüsusiyyətlərinin – ümumi yaddaş bant genişliyinin (1.400 GB/s) və giriş/çıxış sürətlərinin (1.100 GB/s) – ixrac limitlərini aşması idi. Qadağa "Nvidia" üçün potensial olaraq 15-16 milyard dollarlıq gəlir itkisi riski yaradırdı.
Lakin bu məhdudiyyət uzun sürmədi. Şirkətin ABŞ daxilində iri həcmli investisiyalar açıqlamasından sonra qadağalar yüngülləşdirildi. Bununla belə, bu qərar bəzi Konqres üzvləri tərəfindən narazılıqla qarşılandı. Tənqidlər əsasən bu tip addımların Çinin süni intellekt imkanlarını məhdudlaşdırmaq səylərinə zərbə vurduğu fikrinə əsaslanır.
“DeepSeek” mübahisələrin mərkəzində
Çinli süni intellekt startapı "DeepSeek"in daha əvvəl qadağan edilmiş H800 çipləri ilə güclü bir model hazırlaması bu mövzudakı gərginliyin əsasını təşkil edir. H800, H20 modelindən bir qədər daha güclü sayılırdı və 2023-cü ilin oktyabrında ABŞ tərəfindən ixracı qadağan edilmişdi. Buna baxmayaraq, Çinli şirkətlər bu məhdudiyyətləri müxtəlif yollarla aşmağı bacarıblar.
"Nvidia"nın sözçüsü Hektor Marinez bildirib ki, baş direktor Censen Huanq iyul ayında həm Vaşinqtonda, həm də Pekində rəsmilərlə görüşlər keçirib və bu müzakirələrdə süni intellektin iş dünyası və cəmiyyət üçün faydalarını vurğulayıb.
Paşa Məmmədli
