Almaniya, Rusiyanın yaratdığı təhlükəsizlik narahatlıqları səbəbindən əsgər sayını artırmaq və ehtiyat qüvvələri gücləndirmək məqsədilə altı ay davam edəcək bir hərbi xidmət proqramı hazırlayır.
"Cebheinfo.az" xəbər verir ki, məsələyə yaxın mənbələrin verdiyi məlumata görə, xidmətə çağırılacaq əsgərlər bazaları qoruyacaq, logistika vəzifələrini yerinə yetirəcək və bu müddət ərzində hərbi təlim keçəcəklər.
Plan ilkin mərhələdə könüllülük prinsipi ilə həyata keçiriləcək. Lakin könüllü müraciətlərin kifayət qədər olmaması halında məcburi hərbi xidmətin yenidən gündəmə gələ biləcəyi bildirilir.
Müdafiə naziri Boris Pistorius xidmət edən əsgər sayını 180 mindən 260 minə çatdırmağı planlaşdırır.
Bu proqramla hazırda 100 minə yaxın olan təlimli ehtiyat əsgərlərin sayının iki dəfə artırılması və hətta bəzi könüllülərin peşəkar orduya qoşulması nəzərdə tutulur.
Müdafiə Nazirliyi yeni sistemin 2026-cı ilin may ayında ilk əsgərlərini hazırlamağa başlaması üçün işlərin sürətlə davam etdiyini və qanunun yanvar ayında qüvvəyə minməsinin planlaşdırıldığını açıqlayıb.
