Britaniyada aparılan arxeoloji tədqiqatlar zamanı qədim Roma dövrünə aid nadir tapıntılar gün üzünə çıxıb.
AzPost xəbər verir ki, İngiltərənin Qlosterşir qraflığında təsadüfən aşkarlanan iki Roma qılıncı arxeoloqları Dəmir dövrünə aid yaşayış məskəninin izlərinə aparıb. Bu barədə “The Guardian” nəşri məlumat yayıb.
Tapıntılar hələ 2023-cü ildə metal detektoru ilə axtarış aparan bir həvəskar tərəfindən aşkar olunub. Qılınclar cəmi 2,5 sm dərinlikdə yerləşirdi və əgər vaxtında aşkarlanmasaydı, kənd təsərrüfatı texnikası tərəfindən zədələnə bilərdi. Arxeoloq Peter Busbi bu kəşfi “nadir bir şans” adlandırıb.
Əldə olunan məlumatlara görə, qılınclar eramızın II–III əsrlərinə aiddir və “spatha” tipli – yəni Roma süvarilərinin istifadə etdiyi qılınclardır. Onlardan biri üzərində dekorativ naxışlı qaynaq izləri var və bu, onun yüksək rütbəli bir şəxsə məxsus olduğunu göstərir. Tədqiqatçılar ehtimal edir ki, bu silahlar irəliləyən Sakson hücumlarından qorunmaq üçün gizlədilmiş ola bilər.
Sonrakı qazıntılar zamanı məlum olub ki, qılınclar Roma villasının xarabalıqları içərisində basdırılıb. Daha da maraqlısı budur ki, həmin villa daha qədim – Dəmir dövrünə aid bir yaşayış məntəqəsinin üzərində inşa olunub. Bu isə ərazidə ardıcıl məskunlaşmanın olduğunu göstərən mühüm arxeoloji sübutdur.
Qazıntı işləri zamanı həmçinin keramika dam örtüyü, yeraltı istilik sisteminə aid plitələr və boyanmış suvaq fraqmentləri tapılıb. Bu materiallar həmin dövrdə tikinti və məişət texnologiyalarının yüksək səviyyədə olduğunu sübut edir.
Qılınclar və digər tapıntılar hazırda ekspertiza mərhələsindədir və yaxın vaxtlarda ictimaiyyətə muzey sərgisi vasitəsilə təqdim olunacağı gözlənilir.
