Rusiyalı turistləri daşıyan təyyarə Maldiv adalarında fırtınaya düşərək okeanın ortasına iki dəfə fövqəladə eniş etməyə məcbur olub.
KONKRET.az oxu.az-a istinadla xəbər verir ki, bu barədə “SHOT” “Telegram” kanalı məlumat yayıb.
Bildirilib ki, turistlər bir adadan digərinə uçuş zamanı hava şəraitinin kəskin pisləşdiyini müşahidə ediblər. Təyyarə havaya qalxdıqdan qısa müddət sonra hündürlüyü itirməyə və qəfil enməyə başlayıb.
Pilotlar təyyarəni okeanın ortasında su üzərinə uğurla endirə biliblər. Sərnişinlər bir saatdan çox təyyarənin içində qalıblar. Daha sonra pilotlar yenidən havaya qalxmağa cəhd ediblər. Lakin bu dəfə də uğursuzluqla üzləşiblər – təyyarə sola əyilib və güclü küləyin təsiri ilə sahilə doğru sürüklənib. Bu səbəbdən təyyarə yenidən su üzərinə enməyə məcbur olub.
Hadisədən sonra təyyarə yedəkləyicilərin köməyi ilə sahilə çıxarılıb.
Sərnişinlərdən bir qismi sakitləşdirici dərman içib, digərləri isə bu hadisədən sonra aviafobiyanın (uçuş qorxusu) yarandığını bildiriblər.
