İlham Əliyevlə Nikol Paşinyan arasında görüş olacağı xəbəri yayıldı
Son günlər Azərbaycanla Ermənistanın qarşıdakı bir ayda sülh müqaviləsini imzalayacağı iddiaları yenidən gündəmə gəlib. Prezident İlham Əliyev və baş nazir Nikol Paşinyanın iyulda Dubayda görüşəcəkləri də yayılan xəbərlər sırasındadır. Erməni mediası bu barədə “Middle East Eye”yə istinadən xəbər verib. Nəşr iddia edir ki, danışıqların gündəliyinə sülh müqaviləsinin imzalanması daxildir.
Türkiyənin AKP hökumətinə yaxınlığı ilə tanınan və Prezident Rəcəb Tayyib Ərdoğanı xarici səfərlərdə müşayiət edən jurnalist Abdulkadir Selvi isə “CNN-Türk”ün efirində belə bir iddia səsləndirib ki, iyulun sonunda Azərbaycan prezidenti və Ermənistanın baş naziri Birləşmiş Ərəb Əmirliklərinin paytaxtı Dubayda görüşəcəklər.
Aqil Məmmədov
Siyasi ekspert Aqil Məmmədov bildirib ki, son günlər bu cür iddialar yayılsa da, Azərbaycanın iki əsas tələbi hələ də aktuallığını qoruyur və bu məsələlər öz həllini tapmayıb. Əgər Selvinin irəli sürdüyü iddia doğrudursa və iyulun sonunda Dubayda liderlər arasında görüş baş tutacaqsa, burada sülh sazişinin imzalanacağını gözləmək, o qədər də real görünmür: “Bununla belə, Dubay görüşündə tərəflərin ATƏT-in Minsk Qrupunun buraxılması ilə bağlı birgə müraciət qəbul etməsi mümkündür. Bu addım tərəfləri sülh müqaviləsinə daha da yaxınlaşdıra bilər. Lakin bu müraciətdən sonra Minsk Qrupunun buraxılması üçün müəyyən vaxt tələb olunacaq, üzv ölkələrin toplanması və yekun qərarın qəbul edilməsi prosesi azı 6-7 ay çəkə bilər. Növbəti mərhələ Azərbaycanın Ermənistan Konstitusiyasında Azərbaycana qarşı ərazi iddiasının ləğvi üçün irəli sürdüyü tələblə bağlıdır. Bu məsələ gələn il Ermənistanda keçiriləcək parlament seçkiləri zamanı gündəmə gələ və həllini bilər. Əgər əvvəllər Azərbaycanın bu tələbi Ermənistan cəmiyyətində gərginlik yarada bilərdisə, indi həmin məsələ artıq ikinci dərəcəlidir”.
Ekspert hesab edir ki, hazırda Ermənistanın referendum keçirməsi üçün əsas məsələ kilsənin dövlətdən ayrılmasıdır: “Son hadisələr göstərir ki, erməni Apostol kilsəsi köhnə Ermənistanın sonuncu dayağı kimi qalmaqdadır. Bu dayağı sarsıtmadan yeni Ermənistan qurmaq mümkün deyil. Bu səbəbdən Paşinyan və komandası referenduma "Yeni Ermənistan" ideyası ilə gedəcək və əsas vurğu məhz kilsənin dövlətdən ayrılmasına yönəldiləcək. Nikol Paşinyan bu addımı haqlı olaraq Ermənistanın müstəqilliyi və suverenliyi naminə vacib bir qərar kimi təqdim edəcək. Cəmiyyət qarşısında bu seçim qoyulacaq, ya əvvəlki vəziyyətdə qalırıq və regional təcrid davam edir, ya da konstitusiyanı dəyişdirib, gec də olsa regional proseslərə qoşularaq inkişaf yoluna çıxırıq. Hər bir halda regionda baş verən proseslər kulminasiya nöqtəsinə yaxınlaşır. Yeni traktatın pərdəsi açıldıqda isə arxasında tamamilə fərqli bir regional mənzərə ilə qarşılaşacağıq. Ermənistanla Azərbaycan arasında sülh müqaviləsi isə düşünürəm ki, Qafqaz regionundan kənara çıxmayacaq və tərəflər Tiflisdə bir araya gələrək elə sülh sazişini də burada imzalayacaqlar".
A.Məmmədovun qənaətincə, belə olan halda Moskva, Brüssel, Vaşinqton və Ankara arasında həm balans qorunmuş olacaq, həm də sülh müqaviləsi Tiflisdə imzalanmaqla “Böyük Qafqaz evi” ideyasına əlavə rəng qatılacaq və üç Cənubi Qafqaz ölkəsinin yeni əməkdaşlıq modelinin əsası qoyulacaq.
Etibar SEYİDAĞA,
“Yeni Müsavat”
