Sümüklər bədənimizin dayaq sistemini təşkil edən, orqanları qoruyan və hərəkəti mümkün edən əsas strukturlardır...
Pravda.az bildirir ki, uşaqlıqdan qocalığa qədər sümük sağlamlığının qorunması həyat keyfiyyəti baxımından böyük əhəmiyyət daşıyır.
Sümük sağlamlığının əhəmiyyəti
Sümüklər yalnız bədənə forma vermir, həm də həyati orqanları qoruyur və mineralları – xüsusən kalsium və fosforu – ehtiva edərək bir çox bədən funksiyasına dəstək olur. Güclü sümüklər hərəkət azadlığı və müstəqillik təmin edir, zəif sümüklər isə ağrı, sınıq və sağlamlıq problemlərinə səbəb ola bilər.
Raxitizm və D vitamini çatışmazlığı
Raxitizm daha çox uşaqlarda rast gəlinir və əsas səbəbi D vitamini çatışmazlığıdır. Bu vitaminin olmaması sümüklərin normal şəkildə sərtləşməsinə mane olur. Hamilə qadınlar, körpələr, yeniyetmələr və yaşlılar bu çatışmazlıq baxımından risk altındadır. Günəş işığı və somon balığı, sardina, yumurta sarısı kimi qidalar D vitamini mənbələridir.
Osteoporoz – sümük əriməsi
Xüsusilə yaşlılarda müşahidə olunan osteoporoz, sümüklərin kövrəkləşməsinə və asanlıqla sınıqlara səbəb olur. Xəstəlik uzun müddət əlamətsiz keçə bilər. Menopoz sonrası qadınlar risk qrupundadır. Aşağı kalsium və D vitamini qəbulu, fiziki hərəkətsizlik, siqaret və alkoqol istifadəsi risk faktorları sırasındadır.
Sümük sağlamlığını necə qorumalı?
Düzgün qidalanma: Süd məhsulları, yaşıl tərəvəzlər, yağlı balıqlar və fermentləşdirilmiş qidalarla zəngin qidalanma.
Fiziki aktivlik: Yürüş, yüngül qaçış, rəqs və ağırlıq məşqləri sümükləri möhkəmləndirir.
Zərərli vərdişlərdən uzaq durmaq: Siqaret və alkoqol sümük sağlamlığına zərərlidir.
Çəkini balansda saxlamaq: Həddindən artıq arıqlıq da sümükləri zəiflədir.
Osteoporoz zamanı məşqlər
Mütəmadi yürüş, üzgüçülük, velosiped sürmək, balans və dartınma hərəkətləri sümükləri möhkəmləndirir, düşmə riskini azaldır.
Poliqon.info
