Cəlilabadda yol kənarı bazara çevirilib - Sürücülər təhlükədədir

CƏLİLABAD, 2 iyul. TELEQRAF

Yay ayları yaxınlaşdıqca Cəlilabadın köhnə Ələt-Astara magistralının bəzi hissələri qeyri-rəsmi ticarət məkanına çevrilməkdədir. Yolboyu kiçik tutumlu yük avtomobillərinin üzərində bostan bitkiləri, qarpız və yemiş kimi mövsümi məhsullar satışa çıxarılır.

Teleqraf-ın bölgə müxbiri xəbər verir ki, sürücülərin bu məhsullara maraq göstərməsi səbəbindən magistralın hərəkət hissəsində qəfil dayanması tez-tez müşahidə olunur. Bu isə xüsusilə intensiv avtomobil axınının olduğusaatlarda ciddi təhlükə yaradır. Qarpız almaq üçün avtomobilini yol kənarında saxlayan sürücü həm özü, həm də arxadan gələn nəqliyyat vasitələri üçün təhlükəyə səbəb olur.

Təhlükə yalnız sürücülərlə məhdudlaşmır. Yolun qarşı tərəfində dayanan müştərilər bu məhsulları almaq üçün yoldan keçməyə çalışarkən, onlar da hər an qəzanın qurbanına çevrilə bilərlər.

Qeyd edək ki, bu vəziyyət xüsusilə Cəlilabad rayonunun ərazisindən keçən magistral hissədə daha qabarıq şəkildə hiss olunur. Günbəgün yol kənarında satışla məğul olan avtomobillərin sayı artır və bu hal nəinki yol hərəkəti iştirakçıları, hətta yerli əhali üçün də narahatlıq yaradır.

Ekspertlər bildirirlər ki, bu cür hallar ciddi nəzarət mexanizmləri olmadan davam edərsə, həm yol-nəqliyyat hadisələrinin sayı arta, həm də magistral yollarda təhlükəsizlik tamamilə pozula bilər.

• Ticarət
• Cəlilabad
• Sürücü
• Məhsul
• Təhlükə
• Yol
• Bazaar