BAKI, 2 iyul. TELEQRAF
Vaşinqtonun İsrailin İran ərazisindəki obyektlərə zərbələri ərəfəsində İran ordusu Fars körfəzində gəmilərə dəniz minaları yükləyib.
Teleqraf xəbər verir ki, bu barədə adının açıqlanmasını istəməyən iki rəsmi şəxs "Reuters" agentliyinə bildirib. ABŞ kəşfiyyatı tərəfindən aşkar edilən, əvvəllər heç bir məlumat verilməyən bu hazırlıqlar, İsrailin 13 iyunda İrana ilk raket hücumuna başlamasından bir müddət sonra baş verib.
Boğazda yerləşdirilməyən minaların yüklənməsi onu göstərir ki, Tehran dünyanın ən işlək gəmi yollarından birini bağlamaqda ciddi idi. Bu, onsuz da gərginləşən münaqişəni daha da gücləndirəcək, qlobal ticarəti ciddi şəkildə pozacaqdı.
Dünya üzrə neft və qaz nəqlinin təxminən beşdə biri Hörmüz boğazından keçir və onun bağlanması çox güman ki, qlobal enerji qiymətlərinin kəskin artmasına səbəb olacaqdı.
Xatırladaq ki, iyunun 13-də İsrail ABŞ-ın dəstəyi ilə hərbi və nüvə obyektlərini, mülki obyektləri hədəfə alaraq, hərbi liderlərə və nüvə alimlərinə sui-qəsd edərək İrana 12 günlük hücuma keçdi. İran buna cavab olaraq İsrailin hərbi və kəşfiyyat qərargahını ballistik raketlər və pilotsuz təyyarələrlə hədəfə alıb.
ABŞ-nin İranın üç nüvə obyektini bombalamasından qısa müddət sonra İran parlamentinin boğazın bağlanması ilə bağlı tədbiri dəstəklədiyi barədə xəbərlər yayılıb. Amma boğazın bağlanması ilə bağlı İranın Ali Milli Təhlükəsizlik Şurası qərar verməyib.
